கண்டி தேசிய மருத்துவமனையில் நோயாளர்களின் சிகிச்சைச் சேவைகளை வலுப்படுத்தும் நோக்கில், ஆசிய அபிவிருத்தி வங்கியின் (ADB) நிதி உதவியுடன் ரூ. 620 மில்லியன் செலவில் நிறுவப்பட்ட 3 அதிநவீன மருத்துவ உபகரணங்கள் நேற்று (ஆகஸ்ட் 15) மக்கள் பயன்பாட்டிற்கு ஒப்படைக்கப்பட்டன. சுகாதார மற்றும் ஊடகத்துறை அமைச்சர் மருத்துவர் நலிந்த ஜயதிஸ்ஸ மற்றும் சுகாதார பிரதி அமைச்சர் மருத்துவர் ஹன்சக விஜேமுனி தலைமையில் நடைபெற்ற இந்நிகழ்வில், ரூ. 250 மில்லியன் மதிப்பிலான புதிய இதய வடிகுழாய் ஆய்வக அலகு (Cath Lab), ரூ. 190 மில்லியன் மதிப்பிலான சிடி ஸ்கேன் (CT Scan) பிரிவு மற்றும் ரூ. 180 மில்லியன் மதிப்பிலான அதிநவீன மமோகிராபி (Mammography) பிரிவு ஆகியவற்றுடன் சேர்த்து நாட்டின் 5 அதிநவீன மமோகிராபி இயந்திரங்களில் ஒன்றும் இங்கு திறந்து வைக்கப்பட்டது. இப்புதிய இதய வடிகுழாய் அலகின் வருகை இதய நோயாளிகளின் நீண்ட நாள் காத்திருப்போர் பட்டியலை வெகுவாகக் குறைக்கும் என எதிர்பார்க்கப்படும் வேளையில், இந்த ஆண்டில் நாடு முழுவதும் 16 Cath Lab அலகுகளை நிறுவத் திட்டமிட்டுள்ளதாகவும், கண்டி மருத்துவமனையில் ரூ. 8,000 மில்லியன் மதிப்பிலான புற்றுநோய் மற்றும் அவசர சிகிச்சை கட்டிடப் பணிகள் தொடர்ந்து நடைபெற்று வருவதாகவும் சுகாதார அமைச்சர் தெரிவித்தார்
