தங்களின் திருமண நாளை ஆடம்பரக் கொண்டாட்டமாக மாற்றுவதற்குப் பதிலாக, பசியால் வாடும் மக்களின் பசியைப் போக்கும் நாளாக மாற்றிய துருக்கியைச் சேர்ந்த புதுமணத் தம்பதிகள் அனைவரது கவனத்தையும் ஈர்த்துள்ளனர்.
துருக்கியைச் சேர்ந்த ஃபெத்துல்லா உசும்ஜியோக்ளு (Fethullah Üzümcüoğlu) மற்றும் எஸ்ரா பொலாட் (Esra Polat) ஆகியோர், தங்களின் திருமணச் செலவுக்காக ஒதுக்கிய பணத்தைப் பயன்படுத்தி, சிரிய அகதிகளுக்கு உணவளிக்கும் மனிதநேயப் பணியில் ஈடுபட்டுள்ளனர்.
துருக்கியின் கிலிஸ் நகரில், சிரிய எல்லைப் பகுதியில் வசித்த சுமார் 4,000 அகதிகளுக்கு, தங்களின் திருமண நாளிலேயே திருமண ஆடையுடன் சென்று அவர்கள் உணவுப் பொதிகளை வழங்கியதாகத் தெரிவிக்கப்படுகிறது.
'கிம்சே யோக் மு' (Kimse Yok Mu) என்ற தொண்டு நிறுவனத்துடன் இணைந்து முன்னெடுக்கப்பட்ட இந்தச் செயல், திருமணத்தின் மகிழ்ச்சியைத் தம்முடன் மட்டும் பகிர்ந்துகொள்ளாமல், உணவின்றித் தவிக்கும் மக்களுடனும் பகிர்ந்துகொள்ள முடியும் என்பதை எடுத்துக்காட்டும் நிகழ்வாக அமைந்துள்ளது.
ஆடம்பரத்திற்காகச் செலவிடப்படும் ஒரு தொகை, பசியால் தவிக்கும் பலருக்கு உணவாக மாற முடியும் என்பதைத் தமது செயலால் உணர்த்திய இந்தத் தம்பதிகளின் மனிதநேய அணுகுமுறை, சமூக வலைத்தளங்களிலும் மக்களின் கவனத்தை ஈர்த்துள்ளது.
