சமயப் பண்பாடு, அறநெறிக் கல்வி, பாரம்பரியக் கலைகள் எனப் பன்முக ஆளுமைகளை வளர்க்கும் கல்லடி சித்தி விநாயகர் ஆலய அறநெறிப் பாடசாலை!
மட்டக்களப்பு கல்லடி சித்தி விநாயகர் ஆலய அறநெறிப் பாடசாலையின் சரஸ்வதி பூஜை நிகழ்வு, தலைமை ஆசிரியர் திருமதி அருட்சோதி அவர்களின் தலைமையில் சிறப்பாக நடைபெற்றது.
இந்நிகழ்வில் மட்டக்களப்பு மாநகரசபையின் முன்னாள் முதல்வர் டீ. சரவணபவான் மற்றும் மட்டக்களப்பு மாநகரசபை உறுப்பினர் பிரேமானந்தன் ஆகியோர் சிறப்பு அதிதிகளாகக் கலந்து சிறப்பித்தனர்.
கல்வி, கலை மற்றும் ஞானத்தின் தெய்வமாகப் போற்றப்படும் அன்னை கலைமகளை வழிபட்டு, மாணவர்களின் கல்வி வளர்ச்சி, நல்லொழுக்கம், ஆன்மிக மேம்பாடு மற்றும் கலைத்திறன்கள் சிறக்க வேண்டி இவ்விழா முன்னெடுக்கப்பட்டது.
இதன்போது சிறார்களின் பாடல்கள், நாடகம், வில்லிசைப்பாட்டு, தனிநடனம், குழுநடனம் மற்றும் வயலின் இசை உள்ளிட்ட கலை நிகழ்ச்சிகள் இடம்பெற்றன. மாணவர்கள் தமது கலைத்திறன்களை வெளிப்படுத்தி நிகழ்வுக்கு மேலும் சிறப்புச் சேர்த்தனர்.
அறநெறிக் கல்வியுடன் பாரம்பரியக் கலைகளையும் வளர்க்கும் பாடசாலை!
கல்லடி பெருநிலப்பரப்பில் அமைந்துள்ள இவ்வறநெறிப் பாடசாலை, மாணவர்களுக்கு அறநெறிக் கல்வியை வழங்குவதுடன் நின்றுவிடாமல், தமிழர்களின் பாரம்பரியக் கலைகளான வில்லிசைப்பாட்டு மற்றும் மரபுவழிக் கூத்துக் கலைகளையும் பயிற்றுவித்து அவற்றை மேடையேற்றி வருகின்றது.
அந்த வகையில், அண்மையில் அரங்கேற்றப்பட்ட ‘ஆளுமையால் அவ்வை’ வடமோடிக் கூத்து, மட்டக்களப்பு மாவட்டத்தில் பெரும் வரவேற்பைப் பெற்றதாகத் தெரிவிக்கப்படுகிறது. வில்லிசைப் பாடல்களுக்கும் விருதுகள் கிடைத்துள்ளமை இப்பாடசாலையின் கலைப் பயிற்சிப் பணிகளுக்குக் கிடைத்துள்ள அங்கீகாரமாகும்.
மேலும், இவ்வறநெறிப் பாடசாலை மாணவர்கள் தமிழ் தினப் போட்டிகளில் மாகாண மற்றும் தேசிய மட்டங்களில் விருதுகளை வென்று பாடசாலைக்கும் கல்லடிப் பிரதேசத்திற்கும் பெருமை சேர்த்துள்ளனர்.
சமயப் பண்பாட்டைப் பேணிப் பாதுகாத்தல், இளைய தலைமுறையினரிடையே நல்லொழுக்கத்தை வளர்த்தல், தமிழர் மரபுக் கலைகளை அடுத்த தலைமுறைக்குக் கடத்துதல் மற்றும் மாணவர்களின் ஆளுமையை மேம்படுத்துதல் ஆகியவற்றை ஒருங்கிணைக்கும் பணியில் இவ்வறநெறிப் பாடசாலை குறிப்பிடத்தக்க பங்களிப்பை வழங்கி வருகின்றது.
இந்நிகழ்வில் அறநெறிப் பாடசாலை ஆசிரியர்கள், மாணவர்கள், பெற்றோர்கள், நலன்விரும்பிகள் உள்ளிட்ட பலரும் கலந்துகொண்டனர்.
சமயத்தால் நற்பண்பு… கல்வியால் உயர்வு… கலையால் அடையாளம்!
கல்லடி சித்தி விநாயகர் ஆலய அறநெறிப் பாடசாலையின் இத்தகைய முயற்சிகள், எதிர்காலத் தலைமுறையினரிடம் ஆன்மிக விழுமியங்களையும் தமிழர் பண்பாட்டையும் கலை மரபுகளையும் கொண்டு சேர்க்கும் பணியாக அமைகின்றன.
— BATTI MEDIA
