இந்த ஆண்டின் முதல் ஒன்பது மாதங்களில் சிறுவர்கள் மீதான அத்துமீறல்கள் தொடர்பாக 364 முறைப்பாடுகள் பதிவு செய்யப்பட்டுள்ளதாக தேசிய சிறுவர் பாதுகாப்பு அதிகாரசபை (NCPA) தெரிவித்துள்ளது.
அதே காலகட்டத்தில், கடுமையான பாலியல் ரீதியான அத்துமீறல்கள் தொடர்பான 114 முறைப்பாடுகள் பெறப்பட்டுள்ளதாகவும் அந்த சபை மேலும் குறிப்பிட்டுள்ளது.
குழந்தைகள் மீதான அத்துமீறல்கள் மற்றும் குழந்தைகள் தொடர்பான பிற பிரச்சினைகள் குறித்து பாதுகாப்பு அதிகாரசபையால் மொத்தம் 9,613 முறைப்பாடுகள் பெறப்பட்டன. இதில், செப்டெம்பர் மாதத்தில் அதிகபட்சமாக 1,554 முறைப்பாடுகள் பதிவு செய்யப்பட்டுள்ளன.
இந்த முறைப்பாடுகளில், 169 துஷ்பிரயோக வழக்குகள், எட்டு பாலியல் சுரண்டல் வழக்குகள், குழந்தை கடத்தல் தொடர்பான 40 வழக்குகள், போதைப்பொருள் கடத்தலுக்கு சிறுவர்களைப் பயன்படுத்திய 37 வழக்குகள் மற்றும் குழந்தைகளுக்கு எதிரான கொடுமை தொடர்பான 1,889 வழக்குகள் அடங்கும்.
கூடுதலாக, இந்த ஆண்டின் முதல் ஒன்பது மாதங்களில், பதின்மவயது கர்ப்பம் தொடர்பான 51முறைப்பாடுகளையும், குழந்தை திருமணங்கள் தொடர்பான ஒன்பது முறைப்பாடுகளையும், போதைப்பொருள் குற்றங்கள் தொடர்பான 99 முறைப்பாடுகளும் பதிவு செய்யப்பட்டுள்ளதாக அந்த சபை பெற்றுள்ளது.
அதே காலகட்டத்தில், சிறுவர்களுக்கு எதிரான இணையவழி வன்முறை தொடர்பாக 196 முறைப்பாடுகளும், குடும்ப வன்முறை தொடர்பான 46 முறைப்பாடுகளும் தங்களுக்குக் கிடைத்துள்ளதாக சிறுவர் பாதுகாப்பு அதிகாரசபை தெரிவித்துள்ளது.
