இலங்கையில் மதுப் பயன்பாட்டினால் ஏற்படும் சுகாதார மற்றும் பொருளாதார பாதிப்புகளுக்காக 2025ஆம் ஆண்டில் சுமார் ரூ.335 பில்லியன் செலவாகியுள்ளதாக புதிய தரவுகள் தெரிவிக்கின்றன.
அதேவேளை, அந்த ஆண்டில் மதுபானங்களுக்கு விதிக்கப்பட்ட வரிகள் மூலம் அரசாங்கம் பெற்ற வருவாய் ரூ.254 பில்லியன் எனக் குறிப்பிடப்பட்டுள்ளது.
இதன்படி, மதுப் பயன்பாட்டினால் நாட்டுக்கு ஏற்பட்டதாக மதிப்பிடப்படும் சுகாதார மற்றும் பொருளாதாரச் செலவு, மதுவரி மூலம் அரசாங்கம் ஈட்டிய வருவாயைக் காட்டிலும் சுமார் ரூ.81 பில்லியன் அதிகமாக காணப்படுகின்றது.
மது மற்றும் போதைப்பொருள் தகவல் மையம் (ADIC) வெளியிட்டுள்ள தரவுகளே இந்த விடயத்தை வெளிக்கொண்டு வந்துள்ளன.
குறிப்பாக, 2025ஆம் ஆண்டில் மதுப் பயன்பாட்டுடன் தொடர்புடைய பாதிப்புகளால் நாட்டின் சுகாதாரத்துறை மற்றும் பொருளாதாரத்தில் ஏற்பட்ட மொத்தச் சுமையே ரூ.335 பில்லியன் என மதிப்பிடப்பட்டுள்ளது. மறுபுறம், மதுபான வரி மூலம் அரசாங்கத்திற்கு கிடைத்த வருவாய் ரூ.254 பில்லியனாக பதிவாகியுள்ளது.
இந்தக் கணக்கீடுகள், மதுப் பயன்பாட்டிலிருந்து கிடைக்கும் அரச வருவாயை மட்டும் கருத்தில் கொள்ளாமல், அதனால் சமூகத்திற்கும் பொருளாதாரத்திற்கும் ஏற்படும் பரந்த அளவிலான செலவுகளையும் கவனத்தில் கொள்ள வேண்டியதன் அவசியத்தை எடுத்துக்காட்டுகின்றன.
இந்தத் தகவல்கள் இலங்கை மத்திய வங்கி, இலங்கை கலால் வரித் திணைக்களம், சுகாதார அமைச்சு உள்ளிட்ட நிறுவனங்களின் தரவுகளுடன், Movendi International, ஐக்கிய நாடுகளின் அபிவிருத்தித் திட்டம் (UNDP) மற்றும் உலக சுகாதார ஸ்தாபனம் (WHO) ஆகியவற்றின் பங்களிப்புடன் மேற்கொள்ளப்பட்ட “இலங்கையில் மதுக் கட்டுப்பாட்டின் சுகாதார மற்றும் பொருளாதாரத் தாக்கங்கள்” என்ற ஆய்வின் அடிப்படையில் பெறப்பட்டுள்ளன.
மதுப் பயன்பாட்டினால் கிடைக்கும் வரி வருவாயை விட, அதனுடன் தொடர்புடைய சுகாதார மற்றும் பொருளாதாரச் செலவுகள் அதிகமாக இருப்பது, இலங்கையில் மதுக் கட்டுப்பாடு தொடர்பான கொள்கைகளை மேலும் வலுப்படுத்த வேண்டியதன் அவசியத்தை வெளிப்படுத்துவதாக இந்தத் தரவுகள் சுட்டிக்காட்டுகின்றன.
