இலங்கையின் நேரடிப் பிறப்பு விகிதம் கடந்த பத்து ஆண்டுகளில் சுமார் 120,000 ஆகக் குறைந்துள்ளதாக மகளிர் மற்றும் சிறுவர் விவகாரங்கள் அமைச்சு அதிர்ச்சித் தகவலை வெளியிட்டுள்ளது. புள்ளிவிவரங்களின்படி, 2019ஆம் ஆண்டில் 319,010 ஆகக் காணப்பட்ட பிறப்புகளின் எண்ணிக்கை, கடந்த 2025ஆம் ஆண்டில் 214,570 ஆக வீழ்ச்சியடைந்துள்ளது. இது ஒட்டுமொத்தமாக 33 சதவீத சரிவாகும்.
நாட்டின் சனத்தொகை சமநிலையைப் பேணுவதற்கு ஆண்டுதோறும் 330,000 முதல் 360,000 பிறப்புகள் அவசியமாகும். எனினும், தற்போதைய பிறப்பு விகிதம் இந்த இலக்கை விடக் கணிசமாகக் குறைந்துள்ளமை கவலைக்குரிய நிலையை ஏற்படுத்தியுள்ளது.
பொருளாதார நெருக்கடி காரணமாக வாழ்க்கைச் செலவு அதிகரிப்பு, இளைஞர்களின் வெளிநாட்டு வேலைவாய்ப்பு மோகம், தாமதமாகும் திருமணங்கள், பெண்களின் கல்வி மற்றும் தொழில் முன்னேற்றம், குடும்பக் கட்டுப்பாடு விழிப்புணர்வு மற்றும் மருத்துவ ரீதியான மலட்டுத்தன்மைப் பிரச்சினைகள் ஆகியவையே இந்த வீழ்ச்சிக்கு முதன்மைக் காரணங்களாகக் கண்டறியப்பட்டுள்ளன.
சனத்தொகை சமநிலையைத் தக்கவைக்கத் தேவையான குறைந்தபட்ச பிறப்பு எண்ணிக்கையைக்கூட நாடு எட்டவில்லை என்பது எதிர்கால மனிதவளப் பற்றாக்குறையை எச்சரிக்கிறது. இச்சூழலில், குடும்பங்களை ஊக்குவிப்பதற்கான அரசாங்கத்தின் சலுகைத் திட்டங்கள் எந்தளவுக்குத் தாக்கத்தை ஏற்படுத்தும் என்பதைப் பொறுத்திருந்தே பார்க்க வேண்டும்.
