ஈழத்து தமிழ் வரலாற்றுப் பக்கங்களில் ஒரு புதிய முத்திரையாக, மட்டக்களப்பு மண்ணில் முதன்முறையாக உலகளாவிய திருக்குறள் மாநாடு எதிர்வரும் ஞாயிற்றுக்கிழமை (28ஆம் தேதி) வெகுவிமரிசையாகத் தொடங்கவுள்ளது. மட்டக்களப்பு சுவாமி விபுலானந்தா அழகியற் கற்கைகள் நிறுவனத்தில் நடைபெறவுள்ள இம்மாநாடு குறித்த உத்தியோகபூர்வ அறிவிப்பை, மாநாட்டு ஏற்பாட்டுக்குழுத் தலைவரும், கிழக்கு பல்கலைக்கழக முகாமைத்துவத் துறைப் பேராசிரியருமான வ. கனகசிங்கம் இன்று (26) கல்லடி திருச்செந்தூர் ஆலய சந்நிதான மண்டபத்தில் நடைபெற்ற ஊடகவியலாளர் சந்திப்பில் வெளியிட்டார்.
உலகளாவிய அறப்பாதைக்கு வள்ளுவம் காட்டும் வாழ்வியல்" எனும் உன்னத நோக்கோடு, மனித வாழ்வின் அடிப்படைத் தத்துவங்களான அறம், பொருள், இன்பம் ஆகியவற்றை உலக அரங்கில் பறைசாற்றும் நோக்கில் 'அகண்ட தமிழ் உலகம்' அமைப்பு இம்மாநாட்டை ஒருங்கிணைத்துள்ளது.
இவ்விழாவில் முதன்மை விருந்தினராக யாழ்ப்பாணப் பல்கலைக்கழகத் துணைவேந்தர் சிரேஷ்ட பேராசிரியர் பொன். பாலசுந்தரநாதன் (வேல்நம்பி) அவர்கள் பங்கேற்கவுள்ளார். அத்துடன், சிறப்பு விருந்தினர்களாக:
மட்டக்களப்பு மாவட்ட அரசாங்க அதிபர் ஜே.எஸ். அருள்ராஜ்
இந்து கலாசார அலுவல்கள் திணைக்களப் பணிப்பாளர் ய. அநிருத்தனன்
அகண்ட தமிழ் உலகம் அமைப்பின் பொதுச் செயலாளர் ஏ. தண்டாயுதபாணி
தழங்குடா தேசிய கல்வியற் கல்லூரி பீடாதிபதி த. கணேசரத்தினம்
உள்ளிட்ட பல முக்கிய ஆளுமைகள் கலந்துகொண்டு சிறப்பிக்கவுள்ளனர்.
வள்ளுவப் பேராசானின் சிந்தனைகளை ஆழமாக ஆராயும் நோக்கில், இம்மாநாடு இரண்டு பிரதான ஆய்வரங்குகளாகத் திட்டமிடப்பட்டுள்ளது. இதில் பல்கலைக்கழகப் பேராசிரியர்கள் மற்றும் துறைசார் அறிஞர்கள் பலரின் ஆய்வுக் கட்டுரைகள் சமர்ப்பிக்கப்படவுள்ளன. இதற்காக வடக்கு, கிழக்கு, மலையகம் மற்றும் கொழும்பு என இலங்கையின் நாலாபுறங்களிலிருந்தும் ஏராளமான கல்வியாளர்களும் தமிழ் ஆர்வலர்களும் மட்டக்களப்பில் ஒன்றுகூடவுள்ளனர்.
இம்மாநாட்டின் மிக முக்கிய அம்சமாக, இலங்கையில் முதன்முறையாக திருக்குறளுக்கு சுமார் 1,450 பக்கங்கள் கொண்ட பிரம்மாண்டமான உரைநூலைத் தனது தனித்துவமான மொழிநடையில் இயற்றி சாதனை படைத்துள்ள முனைவர் மனோன்மணி அவர்களுக்குச் சிறப்புப் பாராட்டும் கௌரவமும் வழங்கப்படவுள்ளது.
இளந்தலைமுறையினரிடம் திருக்குறளைக் கொண்டு சேர்க்கும் நோக்கில், பாடசாலை மாணவர்களுக்காகப் பல்வேறு போட்டிகள் நடத்தப்படவுள்ளன. இப்போட்டிகளில் திறமைகளை வெளிப்படுத்தும் மாணவர்களுக்கு சான்றிதழ்கள், பணப்பரிசுகள் மற்றும் திருக்குறள் நூல்கள் வழங்கி ஊக்குவிக்கப்படவுள்ளனர்.
மட்டக்களப்பு மண்ணில் தடம் பதிக்கும் இந்த உலகளாவிய மாநாடானது, மாணவர்கள் மற்றும் தமிழ் நெஞ்சங்களிடையே திருக்குறளின் வாழ்வியல் நெறிகளை விதைப்பதுடன், வள்ளுவப் பெருந்தகையின் ஆய்வுகளுக்குப் புதியதொரு பரிமாணத்தைத் தேடித்தரும் என பேராசிரியர் வ. கனகசிங்கம் தனது நம்பிக்கையை வெளிப்படுத்தியுள்ளார்.
