நாடு முழுவதும் வெசாக் வாரக் கொண்டாட்டங்கள் களைகட்டியுள்ள நிலையில், மட்டக்களப்பு மாவட்டத்தில் பல்வேறு ஆன்மீக மற்றும் சமூக நிகழ்வுகள் தொடர்ச்சியாக முன்னெடுக்கப்பட்டு வருகின்றன.
இதன் ஒரு அங்கமாக, கிழக்கு மாகாணத்தில் பல்லின மக்களிடையே ஐக்கியத்தையும், மத நல்லிணக்கத்தையும், சகவாழ்வின் அவசியத்தையும் வலியுறுத்தும் நோக்கில் மட்டக்களப்பில் விசேட வெசாக் விழா ஒன்று மிகச் சிறப்பாகக் கொண்டாடப்பட்டது.
மட்டக்களப்பு பார் வீதியில் அமைந்துள்ள " BLOOMING BUDS -FREE SCHOOL கல்வி நிறுவனத்தின் ஏற்பாட்டில் இந்த வெசாக் விழா ஏற்பாடு செய்யப்பட்டிருந்தது.
சிறுவயதிலேயே பிஞ்சு மனங்களில் மொழி, மதப் பாகுபாடுகளைக் கடந்து, நல்லிணக்கத்தை விதைக்க வேண்டும் என்ற உயரிய நோக்கோடு இந்த நிகழ்வு கட்டியெழுப்பப்பட்டிருந்தது.
நிகழ்வில் கலந்துகொண்ட சிறுவர்கள் மற்றும் ஆசிரியர்கள் சிங்கள பாரம்பரிய கலாச்சார உடைகளை அணிந்து வந்து, பன்முகத்தன்மையை அழகாகப் பிரதிபலித்தனர். நிகழ்விடத்தில் புத்த பெருமானின் திருவுருவச் சிலை வைக்கப்பட்டு, அதற்குரிய மரியாதையுடனும் பக்திப் பூர்வமாகவும் வழிபாடுகள் முன்னெடுக்கப்பட்டன. நிகழ்வில் கலந்துகொண்ட ஆசிரியர்கள், மாணவர்கள் மற்றும் பொதுமக்களுக்கு தாகசாந்தியாகக் குளிர்பானங்களும், பிஸ்கட்டுகளும் அன்போடு வழங்கி வைக்கப்பட்டன.
இன்றைய சிறுவர்களே நாளைய சமூகத்தின் தூண்கள். அவர்களுக்குள் சகமத மதிப்பையும், ஐக்கியத்தையும் வளர்ப்பதற்கு இந்த நிகழ்வு ஒரு சிறந்த வழிகாட்டியாக அமைந்தது.
மட்டக்களப்பு மக்கள் மத்தியில் இந்த நிகழ்வு பெரும் வரவேற்பையும், நன்மதிப்பையும் பெற்றுள்ளதுடன், இன நல்லிணக்கத்திற்குச் சான்றாக விளங்கும் ஒரு முன்னுதாரண நிகழ்வாகவும் இது போற்றப்படுகிறது.
