மட்டக்களப்பு நகரில் சவாரி செல்வதாகக் கூறி ஆட்டோவை வாடகைக்கு அமர்த்திய மர்ம நபர்கள், ஓட்டுநருக்கு மயக்க மருந்து தெளித்து அவரிடமிருந்த தங்க நகைகள், ரொக்கப் பணம் மற்றும் கைப்பேசி ஆகியவற்றை கொள்ளையடித்துச் சென்றுள்ள துயரச் சம்பவம் ஒன்று நிகழ்ந்துள்ளது.
பாதிக்கப்பட்ட முதியவர் ரிதிதென்னை காட்டுப் பகுதியில் மயங்கிய நிலையில் மீட்கப்பட்டு, தற்போது மருத்துவமனையில் அனுமதிக்கப்பட்டுள்ளதாக வாழைச்சேனை காவல்துறையினர் தெரிவித்துள்ளனர்.
மட்டக்களப்பு நகரின் 'சின்ன ஆஸ்பத்திரி' ஆட்டோ நிறுத்தத்திலிருந்து சவாரி ஓட்டி வரும் பூநொச்சிமுனையைச் சேர்ந்த 62 வயதுடைய முதியவரே இவ்வாறு பாதிக்கப்பட்டுள்ளார். நேற்று (27) புதன்கிழமை மாலை, இரவு உணவிற்காக இடியப்பம் வாங்கிக்கொண்டு 7 மணி அளவில் வீட்டிற்கு வருவதாகத் தனது குடும்பத்தினருக்கு அவர் தொலைபேசி மூலம் தெரிவித்துள்ளார்.
இதற்கிடையில், ஆட்டோ நிறுத்தத்திற்கு வந்த நபரொருவர் வாழைச்சேனை வரை செல்வதற்காக இவரது ஆட்டோவை வாடகைக்கு பேசியுள்ளார். அதன்பின்னர், இரவு 11 மணியைக் கடந்தும் ஓட்டுநர் வீடு திரும்பாததால் பதற்றமடைந்த அவரது உறவினர்கள் உடனடியாக காவல் நிலையத்தில் புகார் அளித்துள்ளனர்.
நிலைமை இவ்வாறிருக்க, இன்று வியாழக்கிழமை (28) வாழைச்சேனை காவல் எல்லைக்குட்பட்ட ரிதிதென்னை காட்டுப் பகுதியை ஒட்டிய வீதியில், ஆட்டோ ஒன்றிற்குள் நபரொருவர் மயங்கிக் கிடப்பதை அப்பகுதி மக்கள் அவதானித்துள்ளனர். இது குறித்து உடனடியாக காவல்துறைக்குத் தகவல் வழங்கப்பட்டது.
சம்பவ இடத்திற்கு விரைந்த காவல்துறையினர், மயக்கமுற்றிருந்த ஓட்டுநரை மீட்டு சிகிச்சைக்காக மட்டக்களப்பு போதனா மருத்துவமனையில் அனுமதித்தனர்.
ஆட்டோவை சவாரிக்கு எடுத்த நபர்கள், திட்டமிட்டபடி ஓட்டுநருக்கு மயக்க மருந்து தெளித்து, அவரிடமிருந்த ஒரு பவுன் தங்க மோதிரம், பணம் மற்றும் கைப்பேசி போன்றவற்றை பறித்துக் கொண்டு, அவரை அங்கேயே கைவிட்டுத் தப்பியோடியுள்ளது ஆரம்பக்கட்ட விசாரணைகளில் தெரியவந்துள்ளது.
இக் கொடூரக் கொள்ளைச் சம்பவம் தொடர்பாக மட்டக்களப்பு தலைமையக காவல்துறையினரும், வாழைச்சேனை காவல்துறையினரும் இணைந்து தீவிர மேல் விசாரணைகளை முடுக்கிவிட்டுள்ளனர்.
.png)
