சொந்த வீட்டில் நகைகளை திருடி விற்று உந்துருளி , மற்றும் ஸ்மாட் போன் வாங்கிய இளைஞன் அதிரடியாக கைது .மட்டக்களப்பில் சம்பவம்

 

மட்டக்களப்பில் 16 பவுண் தங்க நகைகளை திருடிய இளைஞன் ஒருவர் கைது செய்யப்பட்டுள்ளார்.

அத்துடன் திருட்டுக்கு உடந்தையாக இருந்த இளைஞனின் நண்பனையும், தங்க நகைகளை வாங்கிய நகைக்கடை உரிமையாளரையும் கைது செய்துள்ளதாக மட்டக்களப்பு தலைமையக பொலிஸார் தெரிவித்தனர்.

சம்பவம் தொடர்பில் தெரியவருவதாவது,

18 வயது இளைஞன் தாய் தந்தையை இழந்த நிலையில், அவரை அவரது உறவினர்கள் தமது வீட்டில் வைத்து ஆதரித்து படிக்கவைத்து பராமரித்து வந்தனர். இந்த நிலையில் தமது வீட்டில் வைக்கப்பட்டிருந்த தங்க நகைகள் திருடப்பட்டுள்ளதை அடுத்து பொலிஸ் நிலையத்தில் உறவினர்கள் முறைப்பாடு செய்ததன் பிரகாரம் மேற்கொண்ட விசாரணையில் குறித்த இளைஞனே அதனை திருடியுள்ளதை பொலிஸார் கண்டறிந்தனர்.

குறித்த இளைஞன், வீட்டில் அலுமாரியில் பாதுகாப்பாக வைக்கப்பட்டிருந்த 16 பவுண்கள் கொண்ட 8 தங்க காப்புக்களை திருடி, நண்பனுடன் சேர்ந்து அதனை காத்தான்குடி பிரதேசத்திலுள்ள நகைகடை ஒன்றில் விற்று பணத்தை எடுத்து அதில் 6 இலட்சம் ரூபாவுக்கு உந்துருளி ஒன்றையும், ஸ்மாட் கையடக்க தொலைபேசி ஒன்றையும் வாங்கியதுடன் ஏனைய பணத்தில் உடைகளையும் வாங்கியுள்ளார்.

அதேநேரத்தில், உணவகங்களில் உணவு வாங்கி சாப்பிட்டுள்ளதாகவும் பொலிஸாரின் ஆரம்பகட்ட விசாரணையில் தெரியவந்துள்ளது.

கைது செய்யப்பட்ட 3 பேரையும் மட்டக்களப்பு நீதவான் நீதிமன்றில் ஆஜர்படுத்தியதையடுத்து அவர்களை எதிர்வரும் முதலாம் திகதிவரை விளக்கமறியலில் வைக்குமாறு நீதவான் உத்தரவிட்டார்.