அழிவின் விளிம்பில் இலங்கை காட்டு யானைகள் .

இவ்வருடத்தில் கடந்த ஏழு மாதங்களில் 44 யானைகள் சுட்டுக் கொல்லப்பட்டுள்ளதாக வனவிலங்கு பாதுகாப்புத் திணைக்களம் தெரிவித்துள்ளது.

 

2024 ஆம் ஆண்டு 84 யானைகள் துப்பாக்கிச் சூட்டில் கொல்லப்பட்டுள்ளதாகவும் இது மனித - யானை மோதலையும் சட்டவிரோத வேட்டையின் தாக்கத்தையும் எடுத்துக் காட்டுவதாகத் தெரிவிக்கப்பட்டுள்ளது.

 

வனவிலங்கு பாதுகாப்புத் திணைக்களத்தின் தகவல்களின் அடிப்படையில், 2024 ஆம் ஆண்டில் மொத்தம் 248 யானைகள் பல்வேறு காரணங்களால் மரணித்துள்ளதாகத் தெரிவிக்கப்படுகிறது.

 

இதில் மின்சாரம் தாக்கி 38 யானைகளும் தொடருந்தில் சிக்கி 13 யானைகளும் மரணித்துள்ளன.

 

இதனால் காட்டு யானைகளின் எண்ணிக்கையைப் பாதுகாக்க ஒரு சிறப்புச் செயல் திட்டத்தைத் தொடங்க சுற்றாடல் அமைச்சு தீர்மானித்துள்ளது.

 

கவன்திஸ்ஸ போன்ற நன்கு அறியப்பட்ட யானைகளைப் பாதுகாப்பதற்கும், மரணங்களின் ஆபத்தான அதிகரிப்புக்குப் பின்னால் உள்ள காரணங்களைச் சமாளிப்பதற்கும் இத்திட்டம் செயற்படுத்தப்படவுள்ளது.

 

வலுவான நடவடிக்கை எடுக்கப்படாவிட்டால், நாட்டின் யானைகளின் எண்ணிக்கை ஆபத்தான விகிதத்தில் தொடர்ந்து குறைந்து கொண்டே போகும் என்றும் அதிகாரிகள் எச்சரிக்கின்றனர்.