மட்டக்களப்பு மாவட்ட சிவில் சமூக செயற்பாட்டாளர் ஒன்றியத்தின் தலைவர் சபாரத்தினம் சிவயோகநாதன் ஹர்த்தாலுக்கு எதிர்ப்பு தெரிவித்துள்ளார் .

 

சுமந்திரனால் தனிப்பட்ட முறையில் தீர்மானம் எடுத்து அழைப்பு விடுக்கப்பட்ட ஹர்த்தாலுக்கு ஆதரவினை வழங்காமல் எதிர்ப்பினைத் தெரிவிப்பதாக மட்டக்களப்பு மாவட்ட சிவில் சமூக செயற்பாட்டாளர் ஒன்றியத்தின் தலைவர் சபாரத்தினம் சிவயோகநாதன் தெரிவித்துள்ளார்.

அவர் மேலும் தெரிவிக்கையில், “சுமந்திரன் கொண்டுவரும் எந்த ஒரு செயற்பாட்டுக்கும் பின்னால் சதித்திட்டங்கள், தமிழ்த் தேசிய நீக்கம் என்பது இருக்கும் என்பது உண்மை.

நீதியை இலங்கை அரசிடமே கேட்டு இந்தக் ஹர்த்தால் போராட்டத்துக்கான அழைப்பு விடுக்கப்பட்டது. தற்போது வடக்கு, கிழக்கில் இருக்கின்ற அரசியல் கட்சிகள், சிவில் சமூகங்கள் ஆகிய இணைந்து ஐ.நா.வை நோக்கி அறிக்கைகளை எழுதுவதுடன் போராட்டங்களை நடத்திக் கொண்டிருக்கின்றனர்.

இந்த நேரத்தில் இந்தக் ஹர்த்தாலை முன்னெடுப்பது என்பது உள்ளகப் பொறிமுறையை வலுப்படுத்துவதாகவும், அதனை ஏற்றுக்கொள்வதாகவுமே அமையும். கடையை அடைப்பதன் மூலம் உலகப் பொதுமுறையை வடக்கு, கிழக்கில் உள்ள மக்கள் ஏற்றுக் கொள்கின்றார்கள் என்பதை வெளியில் காட்டுவதே அவரது நோக்கம்.

சர்வதேச பொறிமுறைக்கு ஊடாக நீதி வேண்டும் என்று நாங்கள் வேண்டி நிற்கின்றபோது அந்தப் பொறிமுறையை ஒரு மடைமாற்றும் செயலாகவே இந்தக் ஹர்த்தாலை நாங்கள் பார்க்கின்றோம்.

கடந்த கால வரலாற்றை பார்க்கின்றபோது தமிழ் இனத்துக்கு எதிரான பலவிதமான காரியங்களை முன் நின்று செயற்படுத்தியவர் இந்த சுமந்திரன். எனவே சுமந்திரன் கொண்டு வருகின்ற எந்த ஒரு விடயத்திலும் எமக்கு எள்ளளவும் நம்பிக்கையும் இல்லை.

கடை உரிமையாளர்கள் அல்லது வர்த்தகர்கள் சுமந்திரனின் விருப்பத்திற்குரியவர்கள் அல்ல. அனைத்துக் கட்சிகளுக்கு ஆதரவு வழங்குகின்றவர்களும் வர்த்தகத்தில் ஈடுபடுகின்றனர். இப்படியாக இருக்கும்போது அனைத்துக் கட்சிகள், சிவில் சமூகங்கள், பொது அமைப்புகள் அனைத்துடனும் கதைத்து பேசி ஒரு முடிவு எடுத்திருக்க வேண்டும்.