ஜனாதிபதி ரணில் கைது செய்யப்பட்டதை தவறாக சித்தரிக்க முயலும் ஊழல் அரசியல்வாதிகள்- பா.அரியநேத்திரன் மு.பா.உ

 

 

 

 

பா.அரியநேத்திரன் மு.பா.உ

முன்னாள் ஜனாதிபதி ரணில் கைது செய்யப்பட்டதை தவறாக சித்தரித்து பல ஊழல் அரசியல்வாதிகள் தப்பிக்க முயற்சி செய்வதாக முன்னாள் பாராளுமன்ற உறுப்பினரும், கடந்த 2024, ஜனாதிபதி தேர்தலில் தமிழ் பொது வேட்பாளராக போட்டியிட்டு 226343, வாக்குகளை பெற்று இலங்கையில் 6, ம் இடத்தில் வாக்குகளை பெற்றவருமான பா.அரியநேத்திரன் தெரிவித்தார்.
முன்னாள் ஜனாதிபதி ரணிலின் கைது தொடர்பாக மேலும் கருத்து கூறுகையில்..

முன்னாள் ஜனாதிபதி ரணில் விக்கிரமசிங்க கடந்த 22/08/2025, ல் கைதாகி தற்போது கொழும்பு தேசிய வைத்தியசாலையில் அவசர சிகிச்சை பிரிவில் சிகிச்சை பெற்று வருகிறார்.

அவர் கைது செய்யப்பட்டதன் மூலகாரணம் 2023 செப்டம்பர் 22 மற்றும் 23, ஆகிய திகதிகளில் பொது நிதியிலிருந்து ரூ. 16.6 மில்லியன் பயன்படுத்தி தனிப்பட்ட பிரித்தானிய விஜயத்தில் ஈடுபட்டதாககூறப்படுகிறது.

இதுவும் ஊழல் மோசடியில் ஒன்றுதான்.
ஜனாதிபதியாக பதவியில் இருந்த காலத்தில் அவர் இவ்வாறு பொது நிதியை தனிப்பட்ட விடயத்திற்கு பயன்படுத்தியமையால் தற்போது முன்னாள் ஜனாதிபதி என்ற பெயருடன் ரணில் விசாரணைக்கு அழைக்கப்பட்டு கைதானார்.

சட்டத்திற்கு முன் எல்லோரும் சமன் என்ரால் முன்னாள் ஜனாதிபதிகளும் விதிவிலக்கில்லை குற்றம் நிருபிக்கும் வரை அவரை நீதிமன்றில் நிறுத்தி விசாரிப்பதில் தவறு ஏதும் இல்லை.

ஆனால் தற்போது சில அரசியல் தலைவர்களின் கருத்துக்களை பார்த்தால் ரணில் உத்தமர் அவரை அரசியல் பழிவாங்கவே தேசிய மக்கள் சக்தி அரசு கைது செய்துள்ளது எனவும், அவரை வெள்ளிக்கிழமையில் கைது செய்து பிணைவழங்காமல் விட்டது தவறு எனவும், முன்னாள் ஜனாதிபதி என்ற வகையில் அவர்கள் என்ன மோசடி செய்தாலும் விசாரிக்க கூடாது என்ற ரீதியான கருத்துக்கள் வருவதை காணமுடிகிறது.

எதிர்கட்சி தலைவர் சஜீத்பிரமதாசா ஒரு படி மேலே சென்று ரணிலின் கைது ஜனநாயகத்துக்கு அச்சுறுத்தல் என கூறியுள்ளார்.
எது ஜனநாயகம் ஊழல் மோசடிகளை அரசியல் வாதிகள் செய்தால் அதை கண்டும் காணாமல் இருப்பது ஜனநாயகமா? அதிகாரிகள் அரச ஊழியர்கள் மட்டும் ஊழல் செய்தால் அது தவறு அரசியல்வாதிகள் செய்தால் அது சரி என்ற ரீதியில் இவருடைய கருத்து உள்ளது.

முன்னாள் ஜனாதிபதி ரணில் 55, வருட அரசியல் அநுபவம் கொண்ட பழுத்த அரசியல் தலைவர் அவ்வாறான ஒருவர் குறுகிய காலம் மக்களால் தெரிவு செய்யாமல் ஜனாதிபதியாக 2019, நவம்பர்,16, தொடக்கம் 2022,யூலை,14, வரை .தெரிவு செய்யப்பட்ட கோட்டாபாய நாட்டை விட்டு ஓடிய நிலையில் ஜனாதிபதியாக 2022, யூலை,15, தொடக்கம் 2024, செப்டம்பர்,22, வரை இருந்த காலத்தில்தான் 2023 செப்டம்பர் 22ல் இந்த சம்பவம் இடம்பெற்றுள்ளது.

குற்றம் நிருபிக்கும் வரை அவர் சந்தேக நபரே அன்றி குற்றவாளியில்லை ஆனால் சந்தேக நபர்களை கைதுசெய்வது, கைவிலங்கு இடுவது, தடுத்துவைப்பது என்பன நீதியின்முன் சமனாகவே அது சாதாரண குடிமகன் தொடக்கம் முன்னாள் ஜனாதிபதிகள் வரை பார்க்கப்பட வேண்டும்.

ரணில் கைது செய்யப்பட்டதை எதிர்பதால் அது தவறாக சித்தரிப்பதால் இன்னும் பல ஊழல் பேர்வழிகள்ளையும், இனப்படுகொலையாளர்களையும் சட்டத்திற்கு முன் நிறுத்தாமல் அவர்களை தப்பிக்கவே வழிவகிக்கும்.

தற்போது அரசியல்வாதிகள் உட்பட 20க்கும் மேற்பட்ட நபர்களின் சொத்துக்கள் குறித்து பொலிஸ் நிதி மோசடி புலனாய்வுப் பிரிவு விசாரணைகளை ஆரம்பித்துள்ளது என
செய்தி அண்மையில் ஊடகப்பரப்பில் வெளிவந்தது.அவ்வாறானவர்களை காப்பாற்றவும் ரணிலின் கைது எதிர்ப்புகள் இவ்வாறான மோசடிக்காறர்களுக்கு சாதகமாக அமையும்.

இவரை போன்று வேறொரு முன்னாள் ஜனாதிபதி பல மோசடிகளை செய்தாலும் அவ்வாறானவர்கள் கைதுசெய்யக்கூடாது என்பதையே சிலருடைய நடத்தைகள் கொடிட்டுக்காட்டுகிறது எனவும் முன்னாள் பாராளுமன்ற உறுப்பினரும் ஐனாதிபதி தேர்தலில் தமிழ் பொதுவேட்பாளராக போட்டியிட்டவருமான பா.அரியநேத்திரன் மேலும் கூறினார்.