ஜப்பானின் - ஹிரோஷிமா நகரத்தின் மீது அமெரிக்கா, அணு குண்டுத் தாக்குதல் நடத்தி இன்றுடன் 80 ஆண்டுகள் நிறைவடைகின்றன.
இதனை முன்னிட்டு ஜப்பானில் இன்று காலை நினைவேந்தல் நிகழ்வுகள் இடம்பெற்றன.
ஜப்பானியப் பிரதமர் ஷிகெரு இஷிபா தலைமையில் இந்த நிகழ்வுகள் இடம்பெற்றதாகச் சர்வதேச ஊடகங்கள் செய்தி வெளியிட்டுள்ளன.
”போரில் அணு குண்டு வீச்சுக்கு ஆளான ஒரே நாடு ஜப்பான்” என்று ஹிரோஷிமாவின் நகர முதல்வர் கசுமி மாட்சுய் இதன்போது கூறியுள்ளார்.
”ஜப்பானிய அரசாங்கம் உண்மையான மற்றும்
நீடித்த அமைதியை விரும்பும் மக்களைப் பிரதிநிதித்துவப்படுத்துகிறது”
என்றும் அவர் இதன்போது தெரிவித்துள்ளார்.
ஹிரோஷிமா மற்றும் நாகசாகி ஆகிய
நகரங்களின் மீது அணு குண்டுத் தாக்குதல் நடத்தப்பட்ட பின்னர், ஜப்பான்
சரணடைந்ததன் ஊடாக இரண்டாம் உலகப் போர் முடிவுக்குக் கொண்டுவரப்பட்டது.
இந்த அணு குண்டுத் தாக்குதலில் இரண்டு இலட்சத்துக்கும் மேற்பட்ட மக்கள் கொல்லப்பட்டனர்.
சிலர் உடனடி குண்டுவெடிப்பிலும், ஏனையவர்கள் கதிர்வீச்சு, நோய் மற்றும் தீக்காயங்களாலும் கொல்லப்பட்டனர்.
அதன் தாக்கம் இன்று வரை உயிர் பிழைத்தவர்களிடையே அவதானிக்க முடிகிறது.
இந்தநிலையில் குறித்த குண்டுத்
தாக்குதலின் போது உயிர் பிழைத்த ஷிங்கோ நைட்டோ என்பவர் தமது அனுபவங்களை
ஊடகமொன்றுக்குப் பகிர்ந்துள்ளார்.
இதன்படி, ”குண்டு வெடிப்பால் தனது தந்தை
மோசமாகப் பாதிக்கப்பட்டதாகவும், அவரது தோல் அவரது உடலில் தொங்கிக்
கொண்டிருந்த நிலையில், அவரால் கையைப் கூட பிடிக்க முடியவில்லை' என்றும்
அவர் தமது அனுபவத்தை விபரித்துள்ளார்.
குண்டுத் தாக்குதலின் போது ஷிங்கோ நைட்டோவிற்கு ஆறு வயதாகும்.
அவரது தந்தை மற்றும் இரண்டு சகோதரர்கள் அமெரிக்காவின் அணு குண்டுத் தாக்குதலில் கொல்லப்பட்டனர்.
அவர் தமது கதையை ஹிரோஷிமாவில் உள்ள
மாணவர்களுக்குத் தொடர்ச்சியாகப் பகிர்ந்து வருவதுடன் அதன் சோகத்தை நினைவு
பகிரலுடன் கூடிய கலையாக வெளிப்படுத்துகிறார்.
இதேவேளை, குறித்த தாக்குதலை அடுத்து
பலர் புற்றுநோயால் பாதிக்கப்பட்டதாக, அமெரிக்காவின் அணு குண்டு
தாக்குதலிலிருந்து தப்பிய மற்றுமொரு நபரான சைடோஷி டனகா தெரிவித்துள்ளார்.
தற்போது காசா மற்றும் யுக்ரைனில்
இடம்பெற்று வரும் மோதல்கள் தமக்குக் கடந்த காலத்தை நினைவுபடுத்துவதாகவும்
சைடோஷி டனகா குறிப்பிட்டுள்ளார்.
”மனிதக்குலத்தைப் பல முறை அழிக்கக்கூடிய அணு ஆயுதங்களுடன் வாழ்கிறோம்” என்றும் அவர் விமர்சித்துள்ளார்.
.jpg)
.jpg)
.jpeg)
