மட்டக்களப்பில் ரி 56 ரக துப்பாக்கி ஒன்றும் ரவைகளும் விசேட அதிரடிப்படையினரால் மீட்கப்பட்டுள்ளன.

 

மட்டக்களப்பில் நிலத்தில் புதைக்கப்பட்டிருந்த நிலையில், ரி 56 ரக துப்பாக்கி ஒன்றும் ரவைகளும் விசேட அதிரடிப்படையினரால் நேற்று (01) இரவு மீட்கப்பட்டுள்ளன.

பூம்புகார் பகுதியிலுள்ள காணியொன்றில் கட்டுமானப்பணிகள் இடம்பெற்று வரும் நிலையில், மலசல கூடத்திற்குக் குழி அமைப்பதற்காக நிலத்தைத் தோண்டும் போது புதைத்து வைக்கப்பட்டிருந்த நிலையில் துப்பாக்கியை அவதானித்தவர்கள் உடனடியாக விசேட அதிரடிப்படையினருக்கு அறிவித்துள்ளனர்.

இதனையடுத்து சம்பவ இடத்திற்குச் சென்ற விசேட அதிரடிப்படையினர் ரி 56 ரக துப்பாக்கியையும், 50 துப்பாக்கி ரவைகள், 2 மெகசின்களை மீட்டுள்ளனர்.

இதன்போது மீட்கப்பட்ட ஆயுதங்கள் மட்டக்களப்பு தலைமையக காவல் நிலையத்தில் ஒப்படைக்கப்பட்டுள்ளது.

இது தொடர்பான மேலதிக விசாரணைகளை மட்டக்களப்பு தலைமையக காவல்துறையினர் மேற்கொண்டு வருவதுடன், குறித்த ஆயுதங்களை மட்டக்களப்பு நீதவான் நீதிமன்றத்தில் ஒப்படைக்கவுள்ளமை குறிப்பிடத்தக்கது.