செம்மணி மனித புதைகுழியில் இதுவரையில் 135 என்புக்கூட்டு தொகுதிகள் கண்டுபிடிக்கப்பட்டுள்ளது.

 

யாழ்ப்பாணம் செம்மணி பகுதியில் உள்ள இரண்டு மனித புதைகுழிகளில் இருந்தும் இன்றைய தினம், புதிதாக 5 என்புக் கூட்டு தொகுதிகள் கண்டுபிடிக்கப்பட்டுள்ளன.

அத்துடன், ஏற்கனவே அடையாளம் காணப்பட்ட மனித என்புக்கூட்டு தொகுதிகளில் 6 என்புக்கூடுகள் முற்றாக அகழ்ந்து எடுக்கப்பட்டுள்ளது.

அதன் அடிப்படையில் இன்றுடன்ட 15 நாட்களாக முன்னெடுக்கப்பட்ட இரண்டாம் கட்ட அகழ்வு பணிகளின் இரண்டாவது அமர்வில் மொத்தமாக 61 எலும்புக்கூட்டு தொகுதிகள் முற்றாக அகழ்ந்து எடுக்கப்பட்டுள்ளன.

செம்மணி மனித புதைகுழியில் அகழ்வு பணிகள் இதுவரையில் கட்டம் கட்டமாக 39 நாட்கள் முன்னெடுக்கப்பட்டுள்ளன.

இதன்போது, இதுவரையில் 135 என்புக்கூட்டு தொகுதிகள் கண்டுபிடிக்கப்பட்டுள்ளதுடன், அவற்றில் 126 என்புக்கூட்டுத் தொகுதிகள் முற்றாக அகழ்ந்து எடுக்கப்பட்டுள்ளன.

இதேவேளை, செம்மணியில் தற்போதுள்ள 2 மனித புதைகுழிகளை விட அயலில் மேலும் மனித புதைகுழிகள் உள்ளனவா என்பதனை ஆராயும் நோக்கில், ஸ்கான் நடவடிக்கைகள் முன்னெடுக்கப்பட்டன.

அதன்போது, மேலும் பல இடங்களில் மனிதப் புதை குழிகள் இருப்பதை ஆய்வுக் குழு கண்டறிந்துள்ளது.

 

இதனிடையே நாளைய தினம், முன்னதாக மனித புதைகுழிகளில் இருந்து மீட்கப்பட்ட சான்று பொருட்களை அடையாளம் காணும் வகையில் அவற்றை மக்களுக்கு காட்சிப்படுத்த நடவடிக்கை எடுக்கப்பட்டுள்ளமையும் குறிப்பிடத்தக்கது.