இராமகிருஷ்ண மிஷன் மட்டக்களப்புக்கு ‘சிவநிதி விருது’ வழங்கிக் கௌரவிப்பு- நூற்றாண்டு காலச் சேவைக்கு உயரிய அங்கீகாரம்!

 

இராமகிருஷ்ண மிஷன் மட்டக்களப்புக்கு ‘சிவநிதி விருது’ வழங்கிக் கௌரவிப்பு- 

மனிதநேயப் பணிகளுக்கும் இந்து சமய, கலாசார வளர்ச்சிக்கும் ஆற்றிய மகத்தான பங்களிப்புக்காக யாழ்ப்பாணப் பல்கலைக்கழகத்தின் உயரிய விருது!

மனிதகுல மேம்பாடு, ஆன்மிக விழுமியங்களின் வளர்ச்சி, இந்து சமய மற்றும் கலாசாரப் பணிகள் என நூற்றாண்டு காலமாக அர்ப்பணிப்புடன் சேவையாற்றி வரும் ராமகிருஷ்ண மிஷன் மட்டக்களப்பின் மகத்தான பணிகளைப் பாராட்டி, யாழ்ப்பாணப் பல்கலைக்கழக இந்துக் கற்கைகள் பீடம் தனது உயரிய விருதான ‘சிவநிதி விருதினை’ வழங்கிக் கௌரவித்துள்ளது.

இவ்விருது வழங்கும் நிகழ்வு 2026 ஒக்டோபர் 26ஆம் திகதி நடைபெற்றது.

மட்டக்களப்பு மண்ணில் ஆன்மிகம், கல்வி, மனிதநேயம் மற்றும் சமூக நலன் சார்ந்த பணிகளினூடாக மக்களின் வாழ்வில் நேர்மறையான மாற்றங்களை ஏற்படுத்தி வரும் ராமகிருஷ்ண மிஷனின் நீண்டகாலச் சேவைகளுக்குக் கிடைத்துள்ள இந்த அங்கீகாரம், அதன் அர்ப்பணிப்புப் பணிகளுக்கான சிறப்பான கௌரவமாகக் கருதப்படுகிறது.

இவ்விருதினை ராமகிருஷ்ண மிஷன் மட்டக்களப்பு சார்பாக அதன் பொதுமுகாமையாளர் சுவாமி நீலமாதவானந்தர் அவர்கள் கலந்துகொண்டு பெற்றுக்கொண்டார்.

இந்நிகழ்வில் யாழ்ப்பாணப் பல்கலைக்கழகத் துணைவேந்தர், முன்னாள் துணைவேந்தர்கள், பேராசிரியர்கள், மாணவர்கள் உள்ளிட்ட பலர் கலந்துகொண்டு நிகழ்வைச் சிறப்பித்தனர்.

நூற்றாண்டு காலமாகத் தொடரும் சேவைக்கு பல்கலைக்கழக மட்டத்தில் கிடைத்துள்ள இந்த உயரிய அங்கீகாரம், ராமகிருஷ்ண மிஷன் மட்டக்களப்பின் சமூக, ஆன்மிக மற்றும் கலாசாரப் பணிகளின் முக்கியத்துவத்தை மீண்டும் வெளிப்படுத்தியுள்ளது.

சேவையே ஆன்மிகம்; மனிதநேயமே அதன் அடையாளம் என்பதைத் தனது நீண்டகாலப் பணிகளால் வெளிப்படுத்தி வரும் ராமகிருஷ்ண மிஷன் மட்டக்களப்புக்கு ‘சிவநிதி விருது’ கிடைத்துள்ளமை மட்டக்களப்பு மண்ணுக்கும் பெருமை சேர்க்கும் நிகழ்வாகும்.