.jpeg)
.jpeg)
.jpeg)
.jpeg)
.jpeg)
.jpeg)
.jpeg)
வைத்தியசாலை உத்தியோகத்தர்கள், பாடசாலை மாணவர்கள், அரச அதிகாரிகள் இணைந்து சுற்றுச்சூழல் பாதுகாப்புக்கான முன்னெடுப்பு
மட்டக்களப்பு, திராய்மடு:
சுற்றுச்சூழலைப் பாதுகாத்து, எதிர்காலச் சந்ததியினருக்குப் பசுமையானதும் ஆரோக்கியமானதுமான சூழலை உருவாக்கிக் கொடுக்கும் நோக்கில், மட்டக்களப்பு திராய்மடு ஆரம்ப மருத்துவ சிகிச்சைப் பிரிவு வைத்தியசாலை வளாகத்தில் 55 மரக்கன்றுகள் நடும் நிகழ்வு இடம்பெற்றது.
வைத்தியசாலையின் பொறுப்பு வைத்திய அதிகாரி டாக்டர் எஸ். விவேகானந்தன் தலைமையில், வைத்தியசாலை உத்தியோகத்தர்களும் அபிவிருத்திக் குழு உறுப்பினர்களும் இணைந்து இம்மரநடுகை நிகழ்வை ஏற்பாடு செய்திருந்தனர்.
சுற்றுச்சூழல் பாதுகாப்பின் அவசியத்தை வலியுறுத்துவதுடன், வைத்தியசாலை வளாகத்தைப் பசுமை நிறைந்த, ஆரோக்கியமான சூழலாக மாற்றுவதையும் நீண்டகால அடிப்படையில் நிழல் தரும் மரங்களை வளர்ப்பதையும் நோக்கமாகக் கொண்டு இச்செயற்பாடு முன்னெடுக்கப்பட்டது.
இதன்போது, நீண்டகாலப் பயனளிக்கக்கூடிய இலுப்பை, கத்தா, காட்டுத்தேங்காய், புன்னை உள்ளிட்ட மர வகைகளைச் சேர்ந்த 55 மரக்கன்றுகள் நடப்பட்டன.
இந்நிகழ்வில் மட்டக்களப்பு மாவட்ட வனவளத் திணைக்கள உத்தியோகத்தர்கள், மாவட்டச் செயலக சுற்றாடல் அபிவிருத்தி உத்தியோகத்தர், மாநகர சபை உறுப்பினர்களான கௌரவ கே. ரகுநாதன், டி. கௌரி மற்றும் எஸ். சந்திரகுமாரி ஆகியோர் கலந்துகொண்டனர்.
மேலும், மட்டக்களப்பு ஊறணி சரஸ்வதி வித்தியாலயம், கொக்குவில் விக்னேஸ்வரா வித்தியாலயம், நாவலடி நாமகள் வித்தியாலயம் மற்றும் திராய்மடு தமிழ் வித்தியாலயம் ஆகிய பாடசாலைகளின் அதிபர்கள், ஆசிரியர்கள், மாணவர்கள் உள்ளிட்ட பலரும் நிகழ்வில் பங்கேற்றனர்.
அத்துடன், பொதுச் சுகாதாரப் பரிசோதகர், கிராமியத் தலைவர்கள், ஆலயத் தலைவர்கள் மற்றும் நலன்விரும்பிகளும் கலந்துகொண்டு மரநடுகைச் செயற்பாட்டுக்கு ஒத்துழைப்பு வழங்கினர்.
மரங்களை நடுவதுடன் மட்டும் நின்றுவிடாமல், அவற்றைப் பாதுகாத்து வளர்ப்பதன் மூலம் எதிர்காலத்தில் நிழல், தூய்மையான சுற்றுச்சூழல் மற்றும் ஆரோக்கியமான வாழ்விடத்தை உருவாக்க முடியும். அந்த வகையில், பல்வேறு தரப்பினரையும் ஒன்றிணைத்து முன்னெடுக்கப்பட்ட இம்முயற்சி, சுற்றுச்சூழல் பாதுகாப்பில் சமூகப் பங்கேற்பின் முக்கியத்துவத்தை எடுத்துக்காட்டுகிறது.
இன்றைய மரநடுகை, நாளைய தலைமுறைக்கான பசுமையான முதலீடு!
