உலகில் பிறப்பு விகிதம் குறைந்து கொண்டு போவதற்கு காரணம் என்ன ?

 

உலகளவில் பிறப்பு விகிதம் குறைந்து வருவதற்கு மக்களின் வாழ்க்கைத்தரம் உயர்வது மட்டுமே காரணம் அல்ல என்றும், ஐபோன் உள்ளிட்ட நவீன தொலைப்பேசிகளின் அதீத பயன்பாடே இதற்கு முக்கியக் காரணம் என்றும் இரண்டு புதிய ஆய்வுகள் அதிர்ச்சித் தகவலை வெளியிட்டுள்ளன.

அமெரிக்காவின் தேசிய பொருளாதார ஆராய்ச்சி நிறுவனம் (NBER) நடத்திய ஆய்வில், 2007 முதல் 2011 வரையிலான காலகட்டத்தில் ஐபோன் பயன்பாடு எந்தெந்தப் பகுதிகளில் அதிகரித்ததோ, அங்கெல்லாம் பிறப்பு விகிதம் கணிசமாகக் குறைந்துள்ளமை கண்டறியப்பட்டுள்ளதாக இந்திய ஊடகங்கள் (INDIA TODEY) செய்தி வெளியிட்டுள்ளன.

பாலியல் செயல்பாடுகள் குறைவு; இணையப் பழக்கம் அதிகரிப்பு

நவீன தொலைப்பேசிகளின் வரவு காரணமாக இளைஞர்கள் நேரில் சந்தித்துப் பேசுவது 44 சதவீதத்தால் குறைந்துள்ளதோடு, தம்பதிகளுக்கு இடையிலான பாலியல் செயல்பாடுகளும் குறைந்துள்ளன.

அதற்கு மாற்றாக இணையதளங்களில் நேரத்தைச் செலவிடும் பழக்கம் இரட்டிப்பாகியுள்ளதாக ஆய்வாளர்கள் சுட்டிக்காட்டுகின்றனர்.

அதோடு, தேவையற்ற கர்ப்பத்தைத் தவிர்ப்பதற்கான விழிப்புணர்வும், நவீன கருத்தடை முறைகள் பற்றிய தகவல்களும் நவீன தொலைப்பேசிகள் மூலம் எளிதாகக் கிடைத்ததும் பிறப்பு விகிதச் சரிவுக்கு மற்றொரு காரணமாகக் கூறப்பகின்றது.

128 நாடுகளில் நடத்தப்பட்ட ஆய்வு

இதேவேளை, சின்சினாட்டி பல்கலைக்கழக (University of Cincinnati) பொருளாதார வல்லுநர்கள் 128 நாடுகளில் நடத்திய மற்றொரு ஆய்விலும் இத்தகவல் உறுதி செய்யப்பட்டுள்ளது.

கலாச்சாரம் மற்றும் பொருளாதார நிலைகள் வேறுபட்டிருந்தாலும், நவீன தொலைப்பேசி மற்றும் அதிவேக இணையப் பயன்பாடு அதிகரித்த அனைத்து நாடுகளிலும் ஒரே காலகட்டத்தில் பிறப்பு விகிதம் வேகமாகச் சரிவடைந்துள்ளது.

மேலும் அமெரிக்கா, கனடா போன்ற வளர்ந்த நாடுகள் மட்டுமன்றி, இந்தியா மற்றும் இலங்கை போன்ற நடுத்தர வருவாய் கொண்ட நாடுகளிலும் இந்த தொழில்நுட்பத் தாக்கத்தால் பிறப்பு விகிதம் மிக வேகமாக வீழ்ச்சியடைந்து வருகின்றமை குறிப்பிடத்தக்கது.