பிரபல பாடசாலையொன்றில் இடம்பெற்ற கத்திக்குத்து சம்பவத்தில் உயர்தரத்தை சேர்ந்த 5 மாணவர்கள் காயமடைந்துள்ளனர்.

 

எப்பாவளையிலுள்ள பிரபல பாடசாலையொன்றில் இன்று (13) காலை இடம்பெற்ற கத்திக்குத்து சம்பவத்தில் உயர்தரத்தை சேர்ந்த 5 மாணவர்கள் காயமடைந்துள்ளனர்.

இந்த சம்பவம் தொடர்பில் அதே பாடசாலையைச் சேர்ந்த மாணவர் ஒருவர் காவல்துறையினரால் கைது செய்யப்பட்டுள்ளார்.

காயமடைந்த 5 மாணவர்களும் அதே பாடசாலையில் தொழில்நுட்பப் பிரிவில் (Technology Stream) பயிலும் உயர்தர மாணவர்கள் என அடையாளம் காணப்பட்டுள்ளனர்.

காயமடைந்த மாணவர்கள் எப்பாவளை மாவட்ட மருத்துவமனையில் அனுமதிக்கப்பட்டுள்ளனர்.

எனினும், அவர்களின் காயங்கள் பாரதூரமானவை அல்ல எனத் தெரிவிக்கப்படுகிறது.

தாக்குதல் நடத்திய மாணவன் விஞ்ஞானப் பிரிவைச் சேர்ந்தவர் எனத் தெரியவந்துள்ளது.

இவருக்கும் காயமடைந்த மாணவர்களில் ஒருவருக்கும் இடையே நிலவிய நீண்டகாலத் தகராறே குறித்த தாக்குதலுக்குக் காரணம் என ஆரம்பகட்ட விசாரணைகளில் இருந்து தெரியவந்துள்ளது.

குறித்த மாணவன் ஒருவரைத் தாக்கியபோது, அதனைத் தடுக்க முற்பட்ட ஏனைய நான்கு மாணவர்களும் கத்திக்குத்துக்கு இலக்காகியுள்ளனர்.

தாக்குதலுக்குப் பயன்படுத்தப்பட்ட கூர்மையான ஆயுதத்தை எப்பாவளை காவல்துறையினர் கைப்பற்றியுள்ளதுடன், சம்பவம் குறித்த மேலதிக விசாரணைகளை முன்னெடுத்து வருகின்றனர்.