வீரமுனைப் படுகொலைக்கு கண்ணீர் அஞ்சலி!

 

​அம்பாறை, வீரமுனை: 1990 ஆம் ஆண்டு ஆகஸ்ட் 12 ஆம் தேதி வீரமுனை கிராமத்தில் 232 இற்கும் அதிகமான தமிழ் மக்கள் கொடூரமாக படுகொலை செய்யப்பட்டதன் 35வது ஆண்டு நினைவு தினம் இன்று அனுசரிக்கப்பட்டது. இந்த சோகமான நிகழ்வை நினைவுகூரும் வகையில், வீரமுனையில் உள்ள நினைவுத்தூபிக்கு முன்பாக அஞ்சலி நிகழ்வுகள் உணர்வுபூர்வமாக இடம்பெற்றன.

​நினைவுத்தூபிக்கு மாலை அணிவிக்கப்பட்டும், தீபச்சுடர் ஏற்றியும், ஒரு நிமிட மௌன அஞ்சலியுடனும் கொலை செய்யப்பட்ட மக்களுக்கு அஞ்சலி செலுத்தப்பட்டது. 1990 இல் இடம்பெற்ற வன்செயல்களால், வீரமுனை மற்றும் அதன் சுற்றுவட்டக் கிராமங்களான வீரச்சோலை, மல்லிகைத்தீவு, மல்வத்தை, வளத்தாப்பிட்டி, சொறிக்கல்முனை உள்ளிட்ட பகுதிகளிலிருந்து இடம்பெயர்ந்த நூற்றுக்கணக்கான மக்கள் வீரமுனை சிந்தா யாத்திரைப் பிள்ளையார் கோயில் மற்றும் இராமகிருஸ்ண மிசன் பாடசாலை வளவுகளுக்குள் தஞ்சம் புகுந்திருந்தனர்.

​

​இந்த அஞ்சலி நிகழ்வில், மட்டக்களப்பு மாவட்ட நாடாளுமன்ற உறுப்பினர்களான ஞா. ஸ்ரீநேசன், வைத்தியர் இ. ஸ்ரீநாத், அம்பாறை மாவட்ட நாடாளுமன்ற உறுப்பினர் க.கோடிஷ்வரன், மட்டக்களப்பு மாவட்ட முன்னாள் நாடாளுமன்ற உறுப்பினர் கோ. கருணாகரம், காரைதீவு பிரதேச சபை தவிசாளர் சு. பாஸ்கரன், முன்னாள் தவிசாளர் கே. ஜெயசிறில், சமூக செயற்பாட்டாளர்கள் மற்றும் வீரமுனை மண்ணில் உயிர் நீத்த உறவுகளின் குடும்பத்தினர் எனப் பலரும் கலந்துகொண்டு அஞ்சலி செலுத்தினர்.