ஹர்த்தாலின்போது மட்டக்களப்பு மாநகர சபை முதல்வருக்கு அபகீர்த்தி ஏற்படுத்தும் வகையில் திட்டமிட்ட செயற்பாடுகளை தேசிய மக்கள்சக்தியினர் முன்னெடுத்திருந்ததாக மட்டக்களப்பு மாநகர சபை உறுப்பினர்கள் குற்றஞ்சாட்டியுள்ளனர்.
மாநகர சபை முதல்வர் நடந்துகொண்ட விதம் தொடர்பில் மனசாட்சியுடன் உண்மையினை வெளிப்படுத்துங்கள் என மாநகர சபையின் பிரதி முதல்வர் டினேஸ் தேசிய மக்கள் சக்தி மாநகர சபை உறுப்பினரிடம் கோரியபோதிலும் அதற்கான பதில்கள் வழங்கப்படவில்லை.
மட்டக்களப்பு மாநகர சபையின் மூன்றாவது அமர்வு இன்றைய தினம் (21) மட்டக்களப்பு மாநகர சபையின் முதல்வர் சிவம்பாக்கியநாதன் தலைமையில் நடைபெற்றது.
மட்டக்களப்பு மாநகர சபையின் சம்பிரதாயங்களுடன் சபை அமர்வுகள் ஆரம்பிக்கப்பட்ட நிலையில் மாநகர முதல்வரினால் தலைமையுரையினை தொடர்ந்து மாநகர சபையின் முன்மொழிவுகள் வாசிக்கப்பட்டு சபையின் அனுமதிகள் பெறப்பட்டன.
இதன்போது பல்வேறு வாதப் பிரதிவாதங்களுடன் தீர்மானங்கள் நிறைவேற்றப்பட்டதுடன் மாநகர சபையின் பல்வேறு திட்டங்களுக்குமான அனுமதிகளும் வழங்கப்பட்டன.
சபை அமர்வின்போது ஏனைய விடயப் பரப்புகள் குறித்து மாநகர சபை முதல்வரினால் அறிவிக்கப்பட்ட நிலையில் மாநகர சபை உறுப்பினர் துரைசிங்கம் மதன் அவர்களினால் கடந்த 18 ஆம் திகதி ஹர்த்தால் செயற்பாட்டின்போது மட்டக்களப்பு நகரத்திற்குள் மாநகர சபை முதல்வர் அவர்களை அவமதிக்கும் செயற்பாடுகள் முன்னெடுக்கப்பட்டதாகவும் அதனை தேசிய மக்கள் சக்தியின் மாநகர சபை உறுப்பினர்களும், ஆதரவாளர்களும் முன்னெடுத்ததாகவும் இது தொடர்பில் முதல்வர் நடந்த சம்பவத்தினை தெளிவுபடுத்த வேண்டும் எனவும் கேட்டுக்கொண்டார்.
இதன்போது கருத்துத் தெரிவித்த மட்டக்களப்பு மாநகர சபையின் முதல்வர் அன்றைய தினம் தான் சபை நடவடிக்கைகக்கு தேவையான சில செயற்பாடுகளை முன்னெடுப்பதற்கான மாநகர சபைக்கு வாகனத்தில் சென்றுகொண்டிருந்தபோது கடையொன்றுக்கு முன்பாக தேசிய மக்கள் சக்தி மாநகர சபை உறுப்பினர்கள் மற்றும் தேசிய மக்கள் சக்தி உறுப்பினர்கள் நிற்பதைக்கண்டு இறங்கிச் சென்று அவர்களிடமே ஹர்த்தால் தொடர்பில் பேசியதாகவும் எந்தவொரு வர்த்தர்களிடமும் தான் எந்த அச்சுறுத்தலையும் விடுக்கவில்லையெனவும் மாநகர சபை உறுப்பினர்களை கண்டவுடன் வாகனத்திலிருந்து இறங்கி கதைத்துக் கொண்டிருந்தபோது அதன்போது தன்னை அவமானப்படுத்தும் வகையிலான கருத்துக்களை சிலர் தெரிவித்ததுடன் அவற்றினை பதிவு செய்து திரிவுபடுத்தி செய்திகளை வெளியிட்டுள்ளதாகவும் முதல்வர் இதன்போது தெரிவித்தார்.
இதன்போது தாமும் முதல்வருடன் சென்றதாகவும் அதன்போது அந்தவேளையில் வர்த்தக நிலையங்களுக்கு முன்பாக தேசிய மக்கள் சக்தி மாநகர சபை உறுப்பினர்கள் நின்றுகொண்டிருந்தபோது அங்கு முதல்வர் வாகனத்திலிருந்து இறங்கி அவர்களிடம் உரையாடிக்கொண்டிருந்தபோது தேசிய மக்கள் சக்தியின் மட்டு. நாடாளுமன்ற உறுப்பினர் கந்தசாமி பிரபுவின் சாரதியாக கடமையாற்றுபவ.ர் மாநகர சபை முதல்வரை அவதூறுபடுத்தும் வகையில் கருத்துகளை தெரிவித்தாக இங்கு உரையாற்றிய பிரதி முதல்வர் டினேஸ் தெரிவித்தார்.
இங்கிருக்கும் தேசிய மக்கள் சக்தி உறுப்பினர்கள் உங்கள் மனசாட்சிப்படி நடந்து கொண்டு உண்மையினை சொல்லுங்கள். அங்கு மாநகர சபை முதல்வர் ஏதாவது வர்த்தக நிலையங்களை மூடுமாறு அடாவடி செய்தாரா?நீங்கள் அனைவரும் எதற்காக காந்தி பூங்கா முன்பாக காலையில் குழுமியிருந்தீர்கள் என கேள்வியெழுப்பியதுடன் நாங்கள் யாரையும் வர்த்தக நிலையங்களை பூட்டுமாறு வற்புறுத்தவில்லை. ஆனால் தேசிய மக்கள் சக்தி மாநகர சபை உறுப்பினர்களும், உங்கள் கட்சி ஆதரவாளர்களும் இணைந்து வர்த்தக நிலையங்களை திறக்குமாறு வற்புறுத்தியுள்ளீர்கள் என்றார்.
இதன்போது கருத்துத் தெரிவித்த தேசிய மக்கள் சக்தி உறுப்பினர்கள் சுமந்திரனின் தனிப்பட்ட தேவைக்காக இந்தக் ஹர்த்தால் ஏற்பாடு செய்யப்பட்டதாகவும் இதனால் சாதாரண, அன்றாடம் தொழில் செய்து வரும் மக்கள் பாதிக்கப்பட்டதாகவும் தெரிவித்தனர்.
நாங்கள் எந்தப் போராட்டத்திற்கும் எதிரானவர்கள் அல்ல. ஆனால் திட்டமிட்ட வகையில் மக்களின் அன்றாட வாழ்க்கையினை குழப்பும் வகையில் முன்னெடுக்கப்படும் போராட்டங்களை குழப்பும் வகையில் முன்னெடுக்கப்பட்ட போராட்டம் என்பதனாலேயே நாங்கள் இதற்கு எதிர்ப்பு தெரிவித்தோம்.
இந்தப் போராட்டத்தினை வடக்கு மக்கள் நிராகரித்துள்ளார்கள். அதனை இங்கு செய்ய வேண்டிய அவசியம் இல்லையெனவும் தெரிவித்தனர். எனினும் நாங்கள் போராட்டத்தினைப் பற்றி கதைக்கவில்லை. நகருக்குள் முதல்வரினை அவமதிக்கும் வகையில் முன்னெடுக்கப்பட்ட செயற்பாடுகள் தொடர்பிலும், இதில் ஏதும் உண்மையிருக்கின்றதா என்பது தொடர்பிலும் தமிழரசுக் கட்சி உறுப்பினர்கள் கோரியபோதிலும் எதுவித பதிலும் அதற்கு வழங்கப்படாத நிலையில் முதல்வரினால் சபை அமைதிப்படுத்தப்பட்டு சபை நடவடிக்கைகள் நடைபெற்றன.
இதன்போது சத்துருக்கொண்டான் படுகொலைக்கு நீதி கோரிய விசேட பிரேரணையொன்று க.ரகுநாதன் மற்றும் தயாளகௌரி ஆகியோரினால் கொண்டு வரப்பட்டது. பிரேரணை முதல்வரினால் சமர்ப்பிக்கப்பட்டு சத்துருக்கொண்டான் படுகொலை செய்யப்பட்டவர்களுக்கு இரண்டு நிமிடங்கள் மௌன அஞ்சலி செலுத்தப்பட்டதைத் தொடர்ந்து மாநகர சபை உறுப்பினர் தயாளகௌரி மற்றும் ரகுநாதனால் விசேட உரைகளும் நடைபெற்றன.
.jpg)
.jpeg)
.jpg)
