பணிக்கு சமூகமளிக்காத, அஞ்சல் ஊழியர்களின் ஆகஸ்ட் மாத வேதனம் நிறுத்தப்படும் .

 

உரிய முறையில் விடுமுறைக்கு விண்ணப்பிக்காமல் பணிக்கு சமூகமளிக்காத, அஞ்சல் ஊழியர்களின் ஆகஸ்ட் மாத வேதனம் நிறுத்தப்படும் என அறிவிக்கப்பட்டுள்ளது. 

 

நிதி அமைச்சினால் இது குறித்து அறிவிக்கப்பட்டுள்ளதாக அஞ்சல் மாஅதிபர் தெரிவித்துள்ளார். 

 

முன்னதாக அஞ்சல் தொழிற்சங்கங்களினால் கடந்த ஆறு நாட்களாக தொடர்ச்சியாக முன்னெடுத்து வரும் பணிப்புறக்கணிப்பு போராட்டத்தினால் நாடளாவிய ரீதியில் பொதுமக்கள் பாரிய அசௌகரியங்களை எதிர்கொண்டுள்ளனர். 

 

அஞ்சல் உத்தியோகத்தர்களின் சகல விடுமுறைகளும் இரத்து செய்யப்பட்டுள்ள நிலையிலேயே இந்த பணி நிறுத்தப் போராட்டம் முன்னெடுக்கப்படுகிறது. 

 

மேலதிக வேலை நேரக் கொடுப்பனவு உள்ளிட்ட 19 கோரிக்கைகளை முன்வைத்து கடந்த ஞாயிற்றுக்கிழமை முதல் இந்தப்பணிப்புறக்கணிப்பு போராட்டம் முன்னெடுக்கப்பட்டு வருகிறது. 

 

இதனால், பதுளை, காலி, அநுராதபுரம், குருணாகல் உள்ளிட்ட பிரதான அஞ்சல் அலுவலகங்களின் செயற்பாடுகள் முற்றாக ஸ்தம்பிதமடைந்திருந்தன. 

 

இந்த நிலையில், இந்த பணிப்புறக்கணிப்பு காரணமாக பொது மக்கள் பெரும் அசௌகரியங்களை எதிர்கொண்டுள்ளதாக பிரதி அஞ்சல் மாஅதிபர் சமிஷா டி சில்வா தெரிவித்துள்ளார். 

 

அத்துடன், இதுவரை பணிக்கு சமூகமளிக்காதோர் உடனடியாக பணிக்கு திரும்புமாறும் அவர் கோரிக்கை விடுத்துள்ளார்.

 

அவ்வாறில்லை எனில் சட்ட நடவடிக்கை எடுக்கப்படும் எனவும் கடந்த நாட்களில் சுமார் 100 மில்லியன் ரூபா நஷ்டம் ஏற்பட்டுள்ளதாகவும் பிரதி அஞ்சல் மாஅதிபர் சமிஷா டி சில்வா தெரிவித்துள்ளார்.