மட்டக்களப்பு கல்லடி ஸ்ரீ சித்தி விநாயகர் அறநெறிப் பாடசாலை ஆண்டு விழா.

(கல்லடி செய்தியாளர்)

கல்லடி ஸ்ரீ சித்தி விநாயகர் அறநெறிப் பாடசாலை நடாத்திய வருடாந்த பரிசளிப்பு விழா நேற்று ஞாயிற்றுக்கிழமை (18) கல்லடி விநாயகர் வித்தியாலய ஒன்றுகூடல் மண்டபத்தில் இடம்பெற்றது.

அறநெறிப் பாடசாலை அதிபர் திருமதி தேவநாயகி அருட்ஜோதி தலைமையில் நடைபெற்ற இந்நிகழ்வில், தியாகராஜா கலைக்கோயில் நிறுவுனர் திருமதி பவானி குகப்பிரியா பிரதம அதிதியாகவும், கல்லடி ஸ்ரீ சித்திவிநாயகர் ஆலய பரிபாலன சபைத் தலைவரும், முன்னாள் மட்டக்களப்பு மாநகர முதல்வருமான தியாகராஜா சரவணபவன் சிறப்பு அதிதியாகவும், இந்து கலாசார அபிவிருத்தி உத்தியோகத்தர் திருமதி கயல்விழி கருணாவசந்த, கல்லடி விநாயகர் வித்தியாலய அதிபர் திருமதி சிவலோஜினி விநோதன் மற்றும் கல்லடி ஸ்ரீ சித்திவிநாயகர் ஆலய போஷகர் ஆர்.தனபாலன் ஆகியோர் கௌரவ அதிதிகளாகவும் கலந்து கொண்டனர்.

 இதன்போது மாணவர்களின் வரவேற்பு நடனம், பேச்சு, நடனம், நாடகம், வில்லுப்பாட்டு ஆகிய நிகழ்வுகள் அரங்கேறின.

இப்பரிசளிப்பு விழாவில் பல்வேறு போட்டி நிகழ்வுகளில் சாதனை படைத்த மாணவர்கள் சான்றிதழ்கள் மற்றும் பரிசுப் பொருட்கள் வழங்கிக் கௌரவிக்கப்பட்டனர்.

அத்தோடு அறநெறிப் பாடசாலை அதிபர் மற்றும் அதிதிகளால் பரிசுப் பொருட்கள் வழங்கி பாராட்டப்பட்டனர்.

இந்நிகழ்வில் அறநெறிப் பாடசாலை ஆசிரியர்கள், மாணவர்கள், பெற்றோர்கள் எனப் பலர் கலந்து கொண்டனர்.