பொதுமக்களின் முறைப்பாடுகளின் அடிப்படையில் இரவு நேர உணவகங்களில் விசேட சோதனை நடவடிக்கை – 19 வழக்குகள் பதிவு; 2 உணவு விற்பனை நிலையங்கள் மூடப்பட்டன!

























































மட்டக்களப்பு மாவட்டத்தின் ஓட்டமாவடி, கோறளைப்பற்று மத்தி, வாழைச்சேனை மற்றும் வாகரை ஆகிய சுகாதார வைத்திய அதிகாரி பிரிவுகளில், பொதுமக்களிடமிருந்து தொடர்ச்சியாகக் கிடைக்கப்பெறும் முறைப்பாடுகளின் அடிப்படையிலும், பொதுமக்களுக்குப் பாதுகாப்பான மற்றும் சுகாதாரமான உணவு கிடைப்பதை உறுதிப்படுத்தும் நோக்கிலும், இரவு நேர விசேட உணவுப் பாதுகாப்புப் பரிசோதனைகள் முன்னெடுக்கப்பட்டன.

18.11.2026 அன்று முன்னெடுக்கப்பட்ட இவ்விசேட பரிசோதனைகள், மட்டக்களப்பு பிராந்திய சுகாதார சேவைகள் பணிப்பாளர் Dr. R. முரளீஸ்வரன் அவர்களின் ஆலோசனைக்கு அமைவாகவும், சுற்றுச்சூழல், தொழில்சார் சுகாதாரம் மற்றும் உணவுப் பாதுகாப்புக்குப் பொறுப்பான வைத்திய அதிகாரி Dr. M. அச்சுதன் அவர்களின் தலைமையிலும் நடைபெற்றன.

இந்நடவடிக்கையின்போது உணவகங்கள், பேக்கரிகள், தேநீர்க் கடைகள், இரவு நேர விற்பனை நிலையங்கள், பழச்சாறு விற்பனை நிலையங்கள் மற்றும் தெருவோர உணவு விற்பனை நிலையங்கள் உள்ளிட்ட பல்வேறு உணவு விற்பனை நிலையங்கள் விசேட கவனத்திற்கு உட்படுத்தப்பட்டு, அவற்றின் உணவுப் பாதுகாப்பு மற்றும் சுகாதார நிலைமைகள் விரிவாகப் பரிசோதிக்கப்பட்டன.

இப்பரிசோதனைகளில் சுகாதார வைத்திய அதிகாரிகள், பிராந்திய மேற்பார்வைப் பொதுச் சுகாதாரப் பரிசோதகர்கள், உணவு மற்றும் மருந்துப் பரிசோதகர்கள், மேற்பார்வைப் பொதுச் சுகாதாரப் பரிசோதகர்கள் மற்றும் பொதுச் சுகாதாரப் பரிசோதகர்கள் உள்ளிட்ட சுகாதாரத் துறை அதிகாரிகள் பங்கேற்றனர்.

இதன்போது உணவைக் கையாளுபவர்களுக்கான மருத்துவச் சான்றிதழ்கள் தொடர்பான குறைபாடுகள், தனிநபர் பாதுகாப்பு உபகரணங்களைப் பயன்படுத்தாமை, சுகாதாரமற்ற சுற்றுச்சூழல், உணவுப் பொருட்களை முறையாகச் சேமிக்காமை, உணவுப் பொருட்களின் பெயரிடல் தொடர்பான குறைபாடுகள் மற்றும் பூச்சித் தொல்லைகள் உள்ளிட்ட பல்வேறு சுகாதாரக் குறைபாடுகள் அடையாளம் காணப்பட்டன.

அடையாளம் காணப்பட்ட குறைபாடுகள் தொடர்பாக 19 வழக்குகள் பதிவு செய்யப்பட்டுள்ளதுடன், 2 உணவு விற்பனை நிலையங்களை உடனடியாக மூடுவதற்கான சட்ட நடவடிக்கைகளும் மேற்கொள்ளப்பட்டுள்ளன.

உணவுப் பாதுகாப்பு – அனைவரதும் பொறுப்பு!

உணவக உரிமையாளர்கள் மற்றும் உணவைக் கையாளுபவர்கள் உணவுப் பாதுகாப்பு விதிமுறைகளைத் தவறாது பின்பற்றுவது அவசியமாகும். உணவு தயாரிக்கப்படும் இடங்கள், சமையலறைகள், பாத்திரங்கள் மற்றும் உணவுப் பொருட்களைச் சேமிக்கும் பகுதிகள் எப்போதும் சுத்தமாகப் பராமரிக்கப்பட வேண்டும். அத்துடன், உணவுப் பொருட்கள் ஈக்கள், கரப்பான் பூச்சிகள் மற்றும் ஏனைய பூச்சிகளிடமிருந்து பாதுகாக்கப்பட வேண்டும்.

சுகாதாரமற்ற முறையில் உணவு தயாரிக்கப்படுவது அல்லது விற்பனை செய்யப்படுவது தொடர்பில் பொதுமக்கள் அவதானித்தால், சம்பந்தப்பட்ட சுகாதார வைத்திய அதிகாரி அலுவலகம் அல்லது பொதுச் சுகாதாரப் பரிசோதகரிடம் முறைப்பாடு செய்யுமாறு கேட்டுக்கொள்ளப்படுகின்றனர்.

மேலும், மட்டக்களப்பு பிராந்திய சுகாதார சேவைகள் பணிமனையின் உணவுப் பாதுகாப்பு தொடர்பான முறைப்பாடுகளைப் பின்வரும் WhatsApp இலக்கத்தின் ஊடாகவும் தெரிவிக்க முடியும்.

உணவுப் பாதுகாப்பு முறைப்பாட்டு இலக்கம்:070 571 1151 (WhatsApp)

பொதுமக்களின் ஆரோக்கியத்தைப் பாதுகாப்பதற்கும், உணவினால் ஏற்படக்கூடிய நோய்களின் அபாயத்தைக் குறைப்பதற்கும் இவ்வாறான விசேட உணவுப் பாதுகாப்புப் பரிசோதனைகள் தொடர்ச்சியாக முன்னெடுக்கப்படும் என சுகாதாரத் துறையினர் தெரிவித்துள்ளனர்.