மட்டக்களப்பு வின்சென்ட் மகளிர் உயர்தர தேசிய பாடசாலை – கல்விப் புரட்சியின் 206 ஆண்டுகள்

 

கிழக்கிலங்கையின் கல்வி வரலாற்றில் பெண்களின் கல்விக்கான பாதையைத் திறந்துவைத்த பெருமைக்குரிய கல்வி நிறுவனங்களில் முதன்மையானதாகத் திகழ்வது மட்டக்களப்பு வின்சென்ட் மகளிர் உயர்தர தேசிய பாடசாலையாகும்.

மட்டக்களப்பு நகரின் சப்பல் வீதியில் அமைந்துள்ள இப்பாடசாலை, இரண்டு நூற்றாண்டுகளுக்கும் மேலான கல்விப் பாரம்பரியத்தைக் கொண்டதாகவும், ஆயிரக்கணக்கான பெண் ஆளுமைகளை உருவாக்கிய பெருமைக்குரியதாகவும் விளங்குகிறது.

கல்வி, கலை, விளையாட்டு, அறிவியல், சமூக சேவை என பல்வேறு துறைகளில் சிறந்து விளங்கிய பெண்களை உருவாக்கிய இப்பாடசாலை, மட்டக்களப்பின் கல்வி வரலாற்றில் அழியாத தடத்தைப் பதித்துள்ளது.

இலங்கையில் பிரித்தானியர் ஆட்சிக்காலத்தில் கிறித்தவ மதப்பரப்புப் பணியாளர்கள் நாட்டின் பல பகுதிகளிலும் கல்விப் பணிகளை முன்னெடுத்தனர்.

அந்த வகையில், 1820ஆம் ஆண்டு வெஸ்லியன் மெதடிஸ்த மிஷனரிகளால் மட்டக்களப்பில் வின்சென்ட் பாடசாலையின் ஆரம்பம் அமைந்தது.

மட்டக்களப்பிற்கு முதன்முதலில் வருகை தந்த மெதடிஸ்த மதகுருவான அம்பிரோஸ் வின்சென்ட் உள்ளிட்ட மிஷனரிகளின் அர்ப்பணிப்பான பணியின் ஊடாக இப்பாடசாலைக்கான அடித்தளம் இடப்பட்டது.

பெண்களுக்குக் கல்வி வழங்குவதும், அடிப்படை எழுத்தறிவை வளர்ப்பதும் ஆரம்பகால நோக்கங்களாக அமைந்தன. சிறிய அளவிலான கற்றல் கூடமாகவும் விடுதி வசதியுடனும் தொடங்கிய இந்த கல்விப் பயணம், காலப்போக்கில் மிகப்பெரிய கல்வி நிறுவனமாக வளர்ச்சியடைந்தது.

வின்சென்ட் பாடசாலையின் வரலாற்றில் 20ஆம் நூற்றாண்டின் முற்பகுதி மிக முக்கியமான வளர்ச்சிக் காலமாக அமைந்தது.

குறிப்பாக, சி. கிராஃப்ட் அவர்கள் 1922 முதல் 1946ஆம் ஆண்டு வரை சுமார் 24 ஆண்டுகள் அதிபராகப் பணியாற்றிய காலப்பகுதியில் பாடசாலை குறிப்பிடத்தக்க வளர்ச்சியைப் பெற்றது.

1922ஆம் ஆண்டில் 84 மாணவிகளுடன் இயங்கிய பாடசாலை, கிராஃப்ட் அவர்களின் நிர்வாகக் காலத்தின் நிறைவில் 365 மாணவிகளைக் கொண்ட கல்வி நிறுவனமாக வளர்ச்சியடைந்தது.

1928ஆம் ஆண்டில் பாடசாலை அடுத்த நிலைக்கு தரம் உயர்த்தப்பட்டது. தொடர்ந்து 1929ஆம் ஆண்டில் மாணவிகளுக்கான பெரிய விடுதி மற்றும் பிரார்த்தனைக் கூடம் என்பன அமைக்கப்பட்டன.

1932ஆம் ஆண்டு வின்சென்ட் பாடசாலையின் வரலாற்றில் மற்றுமொரு முக்கிய மைல்கல்லாக அமைந்தது. அந்நாண்டில் யுஜின் நல்லரத்தினம் என்ற மாணவி முதன்முறையாக ‘சீனியர் கேம்பிரிட்ஜ்’ பரீட்சையில் சித்தியடைந்து வரலாற்றுச் சாதனை படைத்தார்.

அதேவேளை, இந்தியாவிலிருந்து வந்த பட்டதாரி ஆசிரியர்கள் மற்றும் இங்கிலாந்தைச் சேர்ந்த ஓ. சேம்ப்னஸ் உள்ளிட்ட கல்வியாளர்களின் பங்களிப்புடன் மனைப்பொருளியல், கலை மற்றும் உடற்கல்வி போன்ற துறைகளும் படிப்படியாக வலுப்பெற்றன.

பல தசாப்தங்களாக மெதடிஸ்த மிஷனரிகளின் நிர்வாகத்தின் கீழ் இயங்கி வந்த வின்சென்ட் பாடசாலை, இலங்கையின் கல்விச் சீர்திருத்தங்களின் பின்னணியில் புதிய கட்டத்தை எட்டியது.

1962ஆம் ஆண்டு கல்விச் சீர்திருத்தத்தின் கீழ், பாடசாலை அரசாங்கத்தின் பொறுப்பின் கீழ் கொண்டுவரப்பட்டு அரசாங்கப் பாடசாலையாக மாற்றப்பட்டது.

இதன் பின்னர் கல்வி, விளையாட்டு, கலை உள்ளிட்ட பல்வேறு துறைகளில் பாடசாலை தொடர்ந்து முன்னேற்றம் கண்டது.

அதன் சிறப்பான கல்விச் செயற்பாடுகளுக்கும் தொடர்ச்சியான சாதனைகளுக்கும் அங்கீகாரமாக, 1994ஆம் ஆண்டு வின்சென்ட் பாடசாலை தேசிய பாடசாலை அந்தஸ்தைப் பெற்றது.

இதன் மூலம் நாட்டின் மத்திய அரசாங்கத்தின் நேரடி நிர்வாகத்தின் கீழ் இயங்கும் முன்னணி கல்வி நிறுவனங்களில் ஒன்றாக வின்சென்ட் மகளிர் உயர்தர தேசிய பாடசாலை உயர்ந்தது.

1820ஆம் ஆண்டு ஒரு சிறிய மிஷனரிப் பாடசாலையாக ஆரம்பிக்கப்பட்ட கல்விப் பயணம், இரண்டு நூற்றாண்டுகளைக் கடந்து இன்று ஆயிரக்கணக்கான மாணவிகளின் எதிர்காலத்தை வடிவமைக்கும் பெரும் கல்வி நிறுவனமாக வளர்ந்துள்ளது.

தற்போது தரம் 1 முதல் தரம் 13 வரையான வகுப்புகளில் தமிழ் மற்றும் ஆங்கில மொழிகளில் மாணவிகளுக்கு கல்வி வழங்கப்பட்டு வருகின்றது. 3,000க்கும் மேற்பட்ட மாணவிகள் கல்வி கற்று வருவதாகத் தெரிவிக்கப்படுகிறது.

வின்சென்ட் மகளிர் உயர்தர தேசிய பாடசாலை கல்வித்துறையில் தொடர்ச்சியான சாதனைகளைப் பதிவு செய்து வருகின்றது.

க.பொ.த. சாதாரண தரம் மற்றும் உயர்தரப் பரீட்சைகளில் மாணவிகள் சிறந்த பெறுபேறுகளைப் பெற்று, மட்டக்களப்பு மாவட்ட மட்டத்திலும் தேசிய மட்டத்திலும் தமது திறமையை வெளிப்படுத்தி வருகின்றனர்.

விஞ்ஞானம், கணிதம், வர்த்தகம், கலை உள்ளிட்ட பல்வேறு துறைகளில் உயர் கல்வியைத் தொடர ஆண்டுதோறும் பெருமளவான மாணவிகள் பல்கலைக்கழகங்களுக்கு தெரிவாகி வருகின்றனர்.

இதன் மூலம் கல்வியில் மட்டுமன்றி, சமூகத்தின் பல்வேறு துறைகளிலும் பெண்கள் முன்னேறுவதற்கான அடித்தளத்தை இப்பாடசாலை தொடர்ந்து உருவாக்கி வருகிறது.

1820ஆம் ஆண்டு ஏற்றப்பட்ட கல்வி விளக்கு, இன்று இரண்டு நூற்றாண்டுகளைக் கடந்து ஆயிரக்கணக்கான மாணவிகளின் வாழ்வில் ஒளியேற்றி வருகிறது.

காலங்கள் மாறினாலும், கல்வியின் மீதான அர்ப்பணிப்பு மாறவில்லை. தலைமுறைகள் மாறினாலும், பெண்களின் கல்வி மற்றும் ஆளுமை வளர்ச்சிக்கான வின்சென்ட் பாடசாலையின் பணி தொடர்ந்து வருகிறது.

“ஒளியை நோக்கி நடப்போம்” என்ற உயரிய சிந்தனையைத் தாங்கி, கல்வி, ஒழுக்கம், தலைமைத்துவம் மற்றும் சமூகப் பொறுப்புணர்வுடன் கூடிய பெண் ஆளுமைகளை உருவாக்கி வரும் வின்சென்ட் மகளிர் உயர்தர தேசிய பாடசாலை, கிழக்கிலங்கையின் கல்விப் பாரம்பரியத்தின் ஒளிவிளக்காக இன்றும் கம்பீரமாகத் திகழ்கிறது.

இது ஒரு பாடசாலையின் இருநூறு ஆண்டுகால வரலாறு மட்டுமல்ல…
கிழக்கிலங்கையில் பெண் கல்வி வளர்ச்சியின் இருநூறு ஆண்டுகாலப் பயணம்!