கடந்த ஆகஸ்ட் மாதம் சூரிய கிரகணத்தைக் கண்டு ரசித்த சுவிட்சர்லாந்து மக்களுக்கு, தற்போது மற்றொரு அரிய வானியல் அதிசயத்தைக் காணும் வாய்ப்பு கிடைத்துள்ளது. ஆகஸ்ட் 28, வெள்ளிக்கிழமை அதிகாலை வேளையில் சுவிட்சர்லாந்து வானில் பகுதி சந்திர கிரகணம் தோன்றுகிறது.
சூரியன், பூமி மற்றும் நிலவு ஆகிய மூன்றும் ஒரே நேர்கோட்டுக்கு அருகில் வரும் போது, பூமியின் நிழல் நிலவின் மீது விழுந்து சந்திர கிரகணம் உருவாகிறது. இந்த நிகழ்வு முழுமையான சந்திர கிரகணம் இல்லை என்ற போதிலும், நிலவின் சுமார் 94% பரப்பை பூமியின் அடர்ந்த கருநிழல் (Umbra) மறைக்கும் எனக் கணக்கிடப்பட்டுள்ளது. இதன் காரணமாக நிலவின் பெரும்பகுதி இருள் சூழ்ந்தும், சில பகுதிகள் சிவப்பு நிறப் பொலிவுடனும் காட்சியளிக்கும்.
பார்க்க வேண்டிய நேரமும் திசையும்:
ஆரம்ப நிலை: அதிகாலை 04:33 மணி
உச்ச நிலை: அதிகாலை 06:12 மணி
நிறைவு நிலை: அதிகாலை 06:46 மணி
அதிகாலை வேளையில் நிலவானது அடிவானத்திற்கு மிகத் தாழ்வாகக் காணப்படும் என்பதால், மேற்கு அல்லது தென்மேற்கு திசையை நோக்கிப் பார்த்து இதைக் கண்டுகளிக்கலாம்.
மேற்கு வானம் தெளிவாகத் தெரியக்கூடிய மலைப் பகுதிகள், திறந்த வெளி மைதானங்கள் மற்றும் ஏரிக்கரைகள் இதைப் பார்வையிடச் சிறந்த இடங்களாகும். நகரத்தின் செயற்கை ஒளிச்சாதனங்கள் (Light Pollution) இல்லாத பகுதிகளைத் தேர்ந்தெடுப்பது சிறந்தது. தவிர, சில வானியல் மையங்களும் அதிகாலையிலேயே பொதுமக்களுக்காகத் திறக்கப்படவுள்ளன.
இன்று காலை சுவிட்சர்லாந்தில் பெரும்பாலும் வறண்ட வானிலையே நிலவும் எனக் கணிக்கப்பட்டிருந்தாலும், சஹாரா பாலைவனப் பகுதிப் புழுதி (Saharan dust) காரணமாக சில இடங்களில் வானம் தெளிவாகத் தெரிவதில் சற்றுத் தடங்கல் ஏற்படலாம்.
இதனைத் தொடர்ந்து, அடுத்த முழு சந்திர கிரகணம் 2028 டிசம்பர் 31 அன்று நிகழும் என வானியல் ஆய்வாளர்கள் தெரிவித்துள்ளனர்.
