இன்று (15 புதன்கிழமை) கதிர்காமம் கொடியேற்றம்! இது அதனையொட்டிய சிறப்பு கட்டுரை:

 

"கதிர்காமமும் கல்யாணகிரியாரும்"

கதிர்காம கருவறையில் சிலை, விக்ரகம் இல்லை; ஆனால் இயந்திரப்பேழை உண்டு!

கதிர்காம ஆலயத்தின் தற்போதைய வழிபாட்டு முறைமை மற்றும் அதன் தெய்வீக சக்திக்கு வித்திட்டவராக கல்யாணகிரியார் கருதப்படுகிறார்.

சரி, கதிர்காமத்திற்கும் கல்யாணகிரியாருக்கும் என்ன சம்பந்தம் ? யார் இந்த கல்யாணகிரியார்? என்பதை இந்த ஆக்கத்தில் பார்ப்போம்.

பதினாறாம் நூற்றாண்டில்  இந்தியாவின் காஷ்மீர் பகுதியைச் சேர்ந்த 'தசநாமி' சந்நியாசி மரபினரான கல்யாணகிரி என்ற தபஸ்வி, கதிர்காம முருகனின் மகிமையைக் கேள்விப்பட்டு இலங்கைக்கு வந்தார்.

 அக்காலத்தில் கதிர்காமம் என்பது அடர்ந்த காடாகவும், கொடிய விலங்குகள் வாழும் ஒரு காட்டுப் பிரதேசமாகவும் இருந்தது.

கதிர்காமம் வந்த கல்யாணகிரியார், அங்கிருந்த மாணிக்க கங்கை நதிக்கரையில் அமர்ந்து, முருகப் பெருமானின் தரிசனம் வேண்டி சுமார் 12 ஆண்டுகள் கடுமையான தவம் (தபஸ்) புரிந்தார். அவரது பக்தியையும் தவத்தையும் சோதிக்கவும், அதற்கு அருள்பாலிக்கவும் முருகன் திருவிளையாடல் புரிந்தார்.

கல்யாணகிரியார் தவமிருந்த போது, அங்கு ஒரு வேடுவச் சிறுவனும் சிறுமியும் (முருகனும் வள்ளியும்) அடிக்கடி வந்து அவருக்கு இடையூறு செய்து விளையாடினர். ஒருநாள் கோபமடைந்த முனிவர், அந்தச் சிறுவனைப் பிடிக்கப் பின் தொடர்ந்தார். சிறுவன் ஓடிச்சென்று மாணிக்க கங்கையின் நடுவே இருந்த ஒரு தீவில் மறைந்தான்.

அங்கு முனிவர் சென்று பார்த்தபோது, சிறுவனுக்குப் பதிலாக பேரொளிப் பிழம்பாக, ஆறு முகங்களும் பன்னிரு கரங்களும் கொண்ட முருகப் பெருமான் வள்ளி-தெய்வானை சமேதராக அவருக்குக் காட்சியளித்தார். தன்னை அத்தனை காலம் அலைக்கழித்தது சாட்சாத் முருகப் பெருமானே என்பதை உணர்ந்த முனிவர் பரவசமடைந்தார்.

முருகப் பெருமானின் தரிசனம் பெற்ற பின்னர், கல்யாணகிரியார் அந்த தெய்வீக ஆற்றலை ஒரு வடிவத்திற்குள் கொண்டுவர விரும்பினார். அவர் ஒரு தங்கத் தகட்டில் (அல்லது செப்புத் தகட்டில்) ரகசிய மந்திர எழுத்துக்கள் மற்றும் முக்கோண வடிவியல் அமைப்புகள் கொண்ட "ஷட்கோண சரவணபவ யந்திரத்தை" (Mystic Yantra) தன் தபோ பலத்தால் வரைந்து, அதற்கு உயிரூட்டினார் (ஆகர்ஷணம் செய்தார்).

கதிர்காம ஆலயத்தின் கருவறையில் முருகனின் சிலையோ அல்லது விக்கிரகமோ கிடையாது.

 கல்யாணகிரியார் ஆகர்ஷணம் செய்து தந்த அந்தப் புனிதமான யந்திரப் பேழை (Casket) மட்டுமே அங்குள்ளது. அது ஒரு வண்ணத் திரைச்சீலையால் மூடப்பட்டிருக்கும்.

இன்றும் கதிர்காமத்தில் நடைபெறும் பூசைகள் மற்றும் திருவிழாக்களின் போது, இந்த யந்திரம் அடங்கிய பேழையே யானை மீது வைக்கப்பட்டு ஊர்வலமாகக் கொண்டு செல்லப்படுகிறது.

அக்காலப்பகுதியில் கண்டி மற்றும் அதனைச் சுற்றியுள்ள பகுதிகளை ஆண்ட மன்னனின் (குறிப்பாக முதலாம் இராஜசிங்கன் அல்லது கண்டி மன்னர்கள் எனக் குறிப்பிடப்படுகிறது) ஆதரவுடன், கல்யாணகிரியார் கதிர்காமத்தில் முறையான ஆலய வழிபாட்டு முறைகளையும், நிர்வாக அமைப்பையும் உருவாக்கினார்.

தேவயானை அம்மன் ஆலயம் கல்யாணகிரியார் மரபுடன் நெருங்கிய தொடர்புடையதாகக் கருதப்படுகிறது. மரபுக் குறிப்புகளின்படி, தேவயானை அம்மனின் வேண்டுகோளின்பேரில் கல்யாணகிரியார் கதிர்காமத்தில் தங்கி, ஆலயத்தையும் வழிபாட்டு மரபையும் நிறுவியதாகக் கூறப்படுகிறது. 

 கருவறையில் வாயைக் கட்டிப் பூசை செய்யும் 'கப்புறாளைமார்' (சிங்களப் பூசாரிகள்) வழிபாட்டு முறை இவரால் அல்லது இவருக்குப் பின்னரான காலப்பகுதியில் முறைப்படுத்தப்பட்டதாகக் கூறப்படுகிறது.

கதிர்காமத்திலேயே தங்கி ஆன்மீகப் பணியாற்றிக் கொண்டிருந்த கல்யாணகிரியார், தனது அவதார நோக்கம் நிறைவேறியதும் அங்கேயே ஜீவ சமாதி அடைந்தார்.

கதிர்காம ஆலய வீதியில், முருகனின் திருக்கை வேல் போன்ற முக்கோண வடிவில் அமைந்துள்ள "முத்துலிங்க சுவாமி கோவில்" (சிவன் கோவில்) என்பது கல்யாணகிரியார் முனிவரின் சமாதித் தலமாகும்.

வித்தகர் விபுலமாமணி வி.ரி.சகாதேவராஜா

காரைதீவு