SIVAKUMAR
மட்டக்களப்பு, களுதாவளையில் வீற்றிருக்கும் அருள்மிகு சுயம்புலிங்கப் பிள்ளையார் ஆலயத்தின் இந்த ஆண்டுக்கான (2026) அலங்காரப் பெருந்திருவிழா கடந்த ஜூன் 13ஆம் திகதி சனிக்கிழமை பக்திப்பூர்வமாகத் தொடங்கியது.
பத்து நாட்கள் தொடர்ந்து நடைபெறவுள்ள இவ்விழாவின் முக்கிய நிகழ்வான தீர்த்தோற்சவம், எதிர்வரும் ஜூன் 22ஆம் திகதி திங்கட்கிழமை காலை 9.00 மணிக்கு ஆனி உத்தர நட்சத்திர நன்னாளில் நடைபெறவுள்ளதுடன், அன்றைய தினத்துடன் திருவிழா நிறைவுபெறுகின்றது.
உற்சவ காலங்களில் தினமும் கூட்டுப் பிரார்த்தனைகள், நாதஸ்வர மேளவாத்தியக் கச்சேரிகள், ஆன்மிகச் சொற்பொழிவுகள், ஸ்தாபனாபிஷேகம், வசந்த மண்டபப் பூஜைகள் மற்றும் சுவாமி உள்வீதி, வெளிவீதி உலா போன்ற பல சிறப்பான வழிபாடுகள் ஏற்பாடு செய்யப்பட்டுள்ளன.
ஜூன் 21 (இரவு): இறுதிநாள் திருவிழாவைச் சிறப்பிக்கும் வகையில், பாரம்பரியமிக்க "மாம்பழத் திருவிழா" வெகுவிமரிசையாக நடைபெறும்.
ஜூன் 22 (காலை): தீர்த்தோற்சவத்தினை முன்னிட்டு திருப்பொற்சுண்ணம் இடித்தல் மற்றும் திருப்பொன்னூஞ்சல் ஆகிய வழிபாட்டு நிகழ்வுகள் இடம்பெறும்.
திருவிழா நடைபெறும் பத்து நாட்களும் களுதாவளை கிராம மக்களின் பேராதரவோடு, அங்குள்ள இந்து இளைஞர் மன்றத்தினரால் வருகை தரும் பக்தர்களுக்குத் தொடர்ச்சியாக அன்னதானம் வழங்கப்படவுள்ளது.
இவ்விழாவில் கலந்துகொள்ளும் அடியார்கள் அனைவரும் நமது பாரம்பரிய தமிழ் கலாசார ஆடைகளை அணிந்து வருகை தருமாறு கேட்டுக்கொள்ளப்படுகிறார்கள். இந்த ஆனி மாத அலங்காரப் பெருவிழாவில் சைவப் பெருமக்கள் அனைவரும் தத்தமது குடும்பத்தினருடன் வருகை தந்து, எம்பிரான் விநாயகரின் திருவருளையும் எல்லையற்ற ஆசிகளையும் பெற்றுச் செல்லுமாறு ஆலய பரிபாலன சபையினர் அன்போடு அழைப்பு விடுத்துள்ளனர்.
