மட்டு - துஷாரா
பாராளுமன்ற உறுப்பினர் இம்ரான் மகரூப் விடுத்துள்ள நோன்புப் பெருநாள் வாழ்த்துச் செய்தி!
புனித நோன்புப் பெருநாளைக் கொண்டாடும் இஸ்லாமியச் சகோதரர்களுக்கு, திருகோணமலை மாவட்ட பாராளுமன்ற உறுப்பினரும் ஐக்கிய மக்கள் சக்தியின் உப செயலாளருமான இம்ரான் மகரூப் விடுத்துள்ள வாழ்த்துச் செய்தியில், உலகளாவிய மோதல்கள் நிறுத்தப்பட்டு அமைதி நிலவ வேண்டுமென வலியுறுத்தியுள்ளார்.
அவர் வெளியிட்டுள்ள வாழ்த்துச் செய்தியின் முழுவிபரம் வருமாறு,
"அன்பும் மரியாதையும் கொண்ட என் சகோதர சகோதரிகள் அனைவருக்கும் இனிய நோன்புப் பெருநாள் நல்வாழ்த்துக்கள்!
அல்லாஹ்வின் அளவற்ற அருளாலும் கருணையாலும் மற்றுமொரு புனித ரமழான் மாதத்தை நாம் வெற்றிகரமாக நிறைவு செய்துள்ளோம். இந்த மகிழ்ச்சியான தருணத்தில், எனது இதயம் கனிந்த வாழ்த்துக்களை உங்கள் அனைவருக்கும் பகிர்ந்து கொள்வதில் மட்டற்ற மகிழ்ச்சியடைகிறேன்.
நோன்பு என்பது வெறும் பசி, தாகத்தை பொறுத்துக் கொள்வது மட்டுமல்ல; அது நமது உள்ளத்தைத் தூய்மைப்படுத்தி, சிந்தனையை உயர்த்தி, மனிதநேயத்தை வளர்க்கும் ஒரு உன்னதமான ஆன்மீகப் பயிற்சியாகும். இந்த ரமழான் காலத்தில் நாம் கற்றுக்கொண்ட பொறுமை, தியாகம், சகிப்புத்தன்மை மற்றும் ஈகை போன்ற உயரிய பண்புகள் எமது அன்றாட வாழ்விலும் தொடர வேண்டும். குறிப்பாக, வறியவர்களையும் தேவையுடையவர்களையும் நினைவில் கொண்டு அவர்களுடன் நமது மகிழ்ச்சியைப் பகிர்ந்து கொள்வதே இந்தப் பெருநாளின் உண்மையான அர்த்தமாகும்.
இன்றைய உலகச் சூழ்நிலையை உற்று நோக்கும் போது, பல நாடுகளில் அமைதி குலைந்து மக்கள் சொல்லொணாத் துயரங்களுக்கு உள்ளாகியிருப்பது கவலையளிக்கிறது. குறிப்பாக, மத்திய கிழக்கு பிராந்தியத்தில் நிலவும் பதற்றமான சூழலும், அதனால் உருவாகியுள்ள மனிதாபிமானச் சிக்கல்களும் உலகச் சமுதாயத்தையே அச்சத்தில் ஆழ்த்தியுள்ளன. அப்பாவிப் பொதுமக்கள் மற்றும் பச்சிளம் குழந்தைகள் போரினால் பாதிக்கப்படுவது நம் மனதை ஆழமாகப் புண்படுத்துகிறது.
இந்த புனிதமான நோன்புப் பெருநாள் தினத்தில், உலகெங்கும் நிலவும் அனைத்து மோதல்களும் நிறுத்தப்பட்டு, அமைதி, நீதியுடன் கூடிய நல்லிணக்கம் நிலைநிறுத்தப்பட வேண்டும் என்று நாம் அனைவரும் இறைவனைப் பிரார்த்திப்போம். மனித குலத்தின் நலன் முன்னிலைப்படுத்தப்பட்டு, அன்பும் இரக்கமும் மேலோங்கும் ஒரு உலகை உருவாக்க நாம் அனைவரும் ஓரணியில் திரள வேண்டும்.
அதேபோல் நமது தாயகத்திலும் இன, மத, மொழி வேறுபாடுகளைக் கடந்து, சமூக ஒற்றுமையும் சகோதரத்துவமும் மேலும் வலுப்பெற வேண்டும். ஒரே மனிதக் குடும்பமாக இணைந்து வாழும் உயரிய பண்பு இந்த நன்னாளில் உறுதிப்படட்டும்.
உங்கள் அனைவரதும் இல்லங்களில் மகிழ்ச்சி, அமைதி மற்றும் வளமான வாழ்வு நிலவ இறைவனைப் பிரார்த்திக்கிறேன். உங்கள் நற்காரியங்கள் அனைத்தையும் எல்லாம் வல்ல அல்லாஹ் ஏற்றுக் கொள்வானாக!
அனைவருக்கும் இனிய நோன்புப் பெருநாள் நல்வாழ்த்துக்கள்!
