ஷிவகுமார்
நடனக் கலையில் பல தலைமுறை மாணவர்களை உருவாக்கி வரும் கலார்ப்பணா – 2026ஆம் ஆண்டில் மூன்று மாணவர்கள் முதல்தரச் சிறப்புப் பட்டம் பெற்று சாதனை!
மட்டக்களப்பு கல்லடியில் இயங்கி வரும் கலார்ப்பணா நாட்டிய நிலையம், பல ஆண்டுகளாக நடனக் கலையில் எண்ணற்ற மாணவர்களை உருவாக்கி, கலைத்துறையில் தனித்துவமான அடையாளத்துடன் திகழ்ந்து வருகின்றது.
நடனக் கலையை அடுத்த தலைமுறைக்குக் கொண்டு செல்வதையும், திறமையான கலைஞர்களையும் கல்விமான்களையும் உருவாக்குவதையும் தனது தொடர்ச்சியான சேவையாகக் கொண்டு இயங்கி வரும் இந்நாட்டிய நிலையம், மட்டக்களப்பு மண்ணின் கலை அடையாளங்களில் ஒன்றாக விளங்குகின்றது.
ஆயிரக்கணக்கான மாணவர்கள் இந்நிலையத்தில் நடனக் கலையைக் கற்று, பல்வேறு பரீட்சைகள், போட்டிகள், அரங்கேற்றங்கள் மற்றும் கலை நிகழ்வுகளில் பங்கேற்று தமது திறமைகளை வெளிப்படுத்தி வருகின்றனர்.
கலார்ப்பணா நாட்டிய நிலையத்தின் செயற்பாடுகள் நடனப் பயிற்சியுடன் மாத்திரம் மட்டுப்படுத்தப்படாமல், மாணவர்களின் கல்வி மற்றும் தொழில்சார் முன்னேற்றத்தையும் இலக்காகக் கொண்டு முன்னெடுக்கப்படுகின்றன.
அந்த வகையில், வட இலங்கை சங்கீத சபைப் பரீட்சைகளுக்கான பயிற்சிகள், லண்டன் கிரிபின் பரீட்சைகளுக்கான பயிற்சிகள், க.பொ.த. சாதாரண தரம் மற்றும் உயர்தரப் பரீட்சைகளுக்கான நடனப் பாடப் பயிற்சிகள், நடன ஆற்றுகைகள் மற்றும் அரங்கேற்றங்கள், நடன நட்டுவாங்க டிப்ளோமா சான்றிதழ் வழங்கும் செயற்பாடுகள், பல்வேறு கலை நிகழ்வுகளுக்கான பயிற்சிகள் மற்றும் பங்கேற்புகள் எனப் பல்வேறு தளங்களில் தனது கலைச் சேவையை விரிவுபடுத்தி வருகின்றது.
இந்நிலையத்தில் பயிற்சி பெற்ற பல மாணவர்கள் நடனப் பாடத்தில் சிறப்புச் சித்திகளைப் பெற்று பல்கலைக்கழகங்களுக்குத் தெரிவாகி, பட்டப்படிப்புகளையும் நிறைவு செய்துள்ளனர். இதன் மூலம் நடனக் கலையை ஒரு பொழுதுபோக்காக மட்டும் பார்க்காமல், உயர்கல்வி மற்றும் தொழில்சார் முன்னேற்றத்திற்கான ஒரு துறையாகவும் வளர்த்தெடுக்கும் பணியில் இந்நிலையம் பங்களித்து வருகின்றது.
கடந்த ஆண்டுகளை விடவும் 2026ஆம் ஆண்டு கலார்ப்பணா நாட்டிய நிலையத்தின் வரலாற்றில் குறிப்பிடத்தக்க ஓர் ஆண்டாக அமைந்துள்ளது.
இந்நிலையத்தில் பயிற்சி பெற்று வளர்ந்த மூன்று மாணவர்கள் இவ்வாண்டு பல்கலைக்கழக மட்டத்தில் முதல்தரச் சிறப்புப் பட்டங்களைப் பெற்றுள்ளதுடன், அதே பல்கலைக்கழகங்களில் தற்காலிக உதவி விரிவுரையாளர்களாகவும் வருகைதரு விரிவுரையாளர்களாகவும் நியமிக்கப்பட்டுச் சாதனை படைத்துள்ளனர்.
அந்த வகையில் செல்வி குணசீலன் அபிராமி, நிமால் ரஞ்சித் பெரேரா மதுஷா, மதனகுமார் சோமிலா ஆகிய மூவரும் கலார்ப்பணா நாட்டிய நிலையத்தின் பெருமையை உயர்த்திய சாதனை மாணவர்களாகத் திகழ்கின்றனர்.
ஒரே ஆண்டில் மூன்று மாணவர்கள் பல்கலைக்கழகத்தில் முதல்தரச் சிறப்புப் பட்டங்களைப் பெற்று, விரிவுரையாளர் பணிகளுக்கான வாய்ப்புகளையும் பெற்றிருப்பது இந்நாட்டிய நிலையத்தின் பயிற்சித் தரத்தையும், மாணவர்களின் கடின உழைப்பையும் எடுத்துக்காட்டும் முக்கியமான சாதனையாகும்.
கடந்த ஆண்டிலும் மூன்று மாணவர்கள் இதேபோன்று குறிப்பிடத்தக்க சாதனைகளைப் படைத்திருந்தமை இங்கு சுட்டிக்காட்டத்தக்கது.
இத்தகைய சாதனைகளின் பின்னணியில் கலார்ப்பணா நாட்டிய நிலையத்தின் இயக்குநர் திருமதி சசிகலாராணி ஜெயராம் அவர்களின் நீண்டகால அர்ப்பணிப்பும், வழிகாட்டலும் முக்கிய பங்கு வகிக்கின்றன.
மாணவர்களின் உள்ளார்ந்த கலைத்திறன்களை இனங்கண்டு, அவர்களுக்குத் தேவையான பயிற்சிகளை வழங்கி, மேடைக் கலைஞர்களாகவும் உயர்கல்வித் தகைமை பெற்றவர்களாகவும் உருவாக்குவதில் அவரது பங்களிப்பு குறிப்பிடத்தக்கதாகும்.
அதேவேளை, இம்மாணவர்கள் அனைவரும் மட்டக்களப்பு கல்லடி உப்போடை விவேகானந்தா மகளிர் கல்லூரியின் முன்னாள் அதிபர் திருமதி திலகவதி ஹரிதாஸ் அவர்களின் அதிபர் காலப்பகுதியில் கல்வி பயின்ற மாணவர்கள் என்பதும் மற்றுமொரு சிறப்பம்சமாகும்.
பாடசாலைக் கல்வியிலும் கலைப் பயிற்சியிலும் கிடைத்த வழிகாட்டல்களும், ஆசிரியர்களின் அர்ப்பணிப்பும், மாணவர்களின் விடாமுயற்சியும் ஒன்றிணைந்ததன் விளைவாகவே இத்தகைய சாதனைகள் சாத்தியமாகியுள்ளன.
ஒரு கலை நிறுவனம் பல ஆண்டுகளாகத் தொடர்ச்சியாக மாணவர்களை உருவாக்கி, அவர்களைப் பல்கலைக்கழகங்களுக்கும் உயர்கல்வித் துறைகளுக்கும் கொண்டு சென்று, பின்னர் அதே கல்வித்துறையில் விரிவுரையாளர்களாகவும் உருவாக்குவது என்பது சாதாரணமான விடயமல்ல.
கலார்ப்பணா நாட்டிய நிலையத்தின் இத்தகைய பயணம், கலைப் பயிற்சி என்பது ஒரு மாணவரின் திறமையை வெளிப்படுத்துவதுடன் மட்டுமல்லாமல், அவரது எதிர்காலக் கல்வி மற்றும் தொழில் வாழ்க்கைக்கும் அடித்தளமாக அமைய முடியும் என்பதை எடுத்துரைக்கின்றது.
கல்லடி உப்போடை விவேகானந்தா மகளிர் கல்லூரியின் கல்விப் பாரம்பரியத்திற்கும், கலார்ப்பணா நாட்டிய நிலையத்தின் கலைச் சேவைக்கும் பெருமை சேர்த்துள்ள இம்மாணவர்களின் சாதனைகள் மட்டக்களப்பு மண்ணின் கலை மற்றும் கல்வி வரலாற்றில் மகிழ்ச்சியுடன் பதிவு செய்யப்பட வேண்டியவையாகும்.
திறமைகளை அடையாளம் கண்டு வளர்க்கும் கலை ஆசிரியர்களும், மாணவர்களுக்கு வழிகாட்டும் கல்வியாளர்களும், தமது இலக்கை நோக்கி விடாமுயற்சியுடன் பயணிக்கும் மாணவர்களும் இணைந்தால் சாதனைகள் தொடர்ந்து உருவாகும் என்பதற்கு கலார்ப்பணா நாட்டிய நிலையத்தின் பயணம் ஓர் எடுத்துக்காட்டாக அமைகின்றது.
