மட்டக்களப்பு மாவட்டத்தின் சித்தாண்டி பகுதியில் டெங்கு நோய் பரவல் அதிகரித்துள்ளதை தொடர்ந்து, சுகாதார துறையினரால் சிவப்பு எச்சரிக்கை விடுக்கப்பட்டுள்ளது.

கடந்த சில வாரங்களாக சித்தாண்டி மற்றும் அதனைச் சுற்றியுள்ள பகுதிகளில் டெங்கு நோயாளிகள் எண்ணிக்கை கணிசமாக உயர்ந்துள்ளதாக சுகாதார அதிகாரிகள் தெரிவித்துள்ளனர். இதனைத் தொடர்ந்து, பொதுமக்கள் அதிக எச்சரிக்கையுடன் இருக்க வேண்டும் என அறிவுறுத்தப்பட்டுள்ளது.
இந்த நிலையில், பொதுச் சுகாதார பரிசோதகர்கள், பொலிஸார், பிரதேச சபை அதிகாரிகள் மற்றும் சுகாதார பணியாளர்கள் இணைந்து வீடு வீடாக ஆய்வு நடவடிக்கைகள் மேற்கொண்டனர். டெங்கு கொசு பெருகக்கூடிய இடங்கள் கண்டறியப்பட்டு, அவற்றை உடனடியாக அகற்ற நடவடிக்கை எடுக்கப்பட்டுள்ளது.
சுத்தமற்ற நீர் தேங்கிய பாத்திரங்கள், பயன்படுத்தப்படாத டயர்கள், பழைய பிளாஸ்டிக் பொருட்கள், திறந்த தொட்டிகள் போன்றவை அகற்றப்பட்டதுடன், பொதுமக்களுக்கு சுத்தம் மற்றும் சுகாதாரம் தொடர்பான விழிப்புணர்வு அறிவுறுத்தல்களும் வழங்கப்பட்டன.
மேலும், டெங்கு அறிகுறிகள் காணப்படின் உடனடியாக அருகிலுள்ள வைத்தியசாலையில் சிகிச்சை பெறுமாறும், வீடுகளிலும் சுற்றுப்புறங்களிலும் நீர் தேங்காமல் பார்த்துக்கொள்ளுமாறும் சுகாதார அதிகாரிகள் கேட்டுக்கொண்டுள்ளனர்.
மாவட்டத்தில் டெங்கு பரவலை கட்டுப்படுத்த தொடர்ச்சியான கண்காணிப்பு நடவடிக்கைகள் மேற்கொள்ளப்படும் என அதிகாரிகள் தெரிவித்துள்ளனர்.
 நீதி மன்றத்தில் 06.02.2026 இன்று தொடுக்கப்பட்ட  30 வழக்குகளில், விசாரணைக்காக 20 வழக்குகள் எடுத்துக்கொள்ளப்பட்டன. இந்த 20 வழக்குகளிலும் தலா பத்தாயிரம் ரூபாய் அபராதம் விதிக்கப்பட்டது.
மேலும், சம்பந்தப்பட்ட எதிராளிகளுக்கு நீதிபதி அவர்களால் கடுமையான எச்சரிக்கை வழங்கப்பட்டு, எதிர்காலத்தில் இத்தகைய குற்றங்களில் ஈடுபட வேண்டாமென அறிவுறுத்தி வழக்குகள் முடிவுறுத்தப்பட்டன.