வாகனங்களில் உள்ள அங்கீகரிக்கப்படாத உபகரணங்கள் மற்றும் பாகங்களை அகற்றும் திட்டம் ஜூலை 01 முதல் மீண்டும் ஆரம்பிக்கப்படும் என்று இலங்கை பொலிஸ் பிரிவு தெரிவித்துள்ளது.
போக்குவரத்து கட்டுப்பாடு மற்றும் சாலை பாதுகாப்புக்கான பொலிஸ் துணை இன்ஸ்பெக்டர் ஜெனரல் இந்திக ஹபுகோட இதனைத் தெரிவித்துள்ளார். இது தொடர்பில் அவர் தெரிவிக்கையில்,
வாகனங்களுக்கான மாற்றங்களில் பிரகாசமான விளக்குகள், ஒலிபெருக்கிகள் மற்றும் உலோக கம்பங்கள் ஆகியவை அடங்கும் . இவை வாகனங்களில் மேலதிகமாக பொருத்தப்பட்டால் சட்டநடவடிக்கை எடுக்கப்படும்.
இதுபோன்ற வாகன மாற்றங்கள் பெரும்பாலும் விபத்துக்களால் பாதிக்கப்பட்டவர்களுக்கு கடுமையான பாதிப்பை ஏற்படுத்துகின்றது.
2024 ஆம் ஆண்டில் சாலை விபத்துகளில் 815 பாதசாரிகள் கொல்லப்பட்டனர். கடந்த ஆண்டு 18-28 வயதுடைய சுமார் 800 மோட்டார் சைக்கிள் ஓட்டுநர்கள் மற்றும் பின்னால் அமர்ந்திருப்பவர்கள் உயிரிழந்ததாக அறிவிக்கப்பட்டது.
2024 ஆம் ஆண்டில், சாலைகளில் இயக்க தகுதியற்ற 8788 வாகனங்களை மோட்டார் போக்குவரத்துத் துறை அடையாளம் கண்டுள்ளது.சாலையில் இயங்கும் பொருத்தமற்ற வாகனங்கள் காரணமாக விபத்துக்கள் ஏற்படுவதாகவும் கண்டறியப்பட்டுள்ளது.
எனவே, பிரச்சினைகள் மற்றும் ஆட்சேபனைகள் தொடர்பில் தெரிவிக்கப்பட்டாலும், வாகனங்களில் இந்த அங்கீகரிக்கப்படாத மாற்றங்கள் அகற்றப்படும் - என்றார்.
