நாடு முழுவதுமுள்ள பொலிஸ் நிலையங்களில் கையடக்கத் தொலைபேசிகள் காணாமல் போதல் மற்றும் திருடப்படுதல் தொடர்பான புகார்கள் நாளாந்தம் பதிவாகி வரும் நிலையில், பொதுமக்கள் பின்பற்ற வேண்டிய மிக முக்கியமான பாதுகாப்பு வழிமுறைகளை இலங்கை பொலிஸ் ஊடகம் வெளியிட்டுள்ளது.
உங்களது கையடக்கத் தொலைபேசி திருடப்பட்டாலோ அல்லது காணாமல் போனாலோ முதலாவது நடவடிக்கையாக உங்களது சிம் (SIM) அட்டையை உடனடியாகச் செயலிழக்கச் செய்ய வேண்டும்.
அதனைத் தொடர்ந்து, உடனடியாக அருகிலுள்ள பொலிஸ் நிலையத்திற்குச் சென்று உத்தியோகபூர்வமாகப் முறைப்பாடு ஒன்றைப் பதிவு செய்வதுடன், அதில் தொலைபேசியின் ஐஎம்இஐ (IMEI) இலக்கத்தைத் துல்லியமாகக் குறிப்பிடுவது அவசியமாகும்.
பொதுமக்கள் தங்களது தொலைபேசிகள் காணாமல் போவதற்கு முன்னரே அதன் IMEI இலக்கத்தை (*#06# என்ற குறியீட்டைப் பயன்படுத்தி) பாதுகாப்பாகக் குறித்து வைத்திருப்பது அவசியமான பொறுப்பாகும் என பொலிஸார் சுட்டிக்காட்டியுள்ளனர்.
மேலும், காணாமல் போன கையடக்கத் தொலைபேசிகளைக் கண்டறிவதற்காக இலங்கை பொலிஸார் ineed.police.lk என்ற பிரத்தியேக இணையப் பக்கத்தை அறிமுகப்படுத்தியுள்ளனர்.
பொதுமக்கள் இந்த இணையத்தளத்திற்குச் சென்று தங்களைப் பதிவு செய்து, தகவல் வழங்குவதன் மூலம் பொலிஸார் உடனடியாகத் தொலைபேசியைக் கண்டுபிடிப்பதற்கான தேடுதல் நடவடிக்கைகளை ஆரம்பிப்பார்கள். இவ்வாறான முறையான புகார்கள் மற்றும் நவீன தொழில்நுட்பக் கட்டமைப்பு ஊடாக, இலங்கை பொலிஸாரால் 2024ஆம் ஆண்டில் காணாமல் போன 2,796 தொலைபேசிகளும், திருடப்பட்ட 928 தொலைபேசிகளும் மீட்கப்பட்டு உரிய உரிமையாளர்களிடம் ஒப்படைக்கப்பட்டுள்ளன.
அதேபோன்று, 2025ஆம் ஆண்டிலும் காணாமல் போன 2,355 தொலைபேசிகள் மீட்கப்பட்டுள்ளதுடன், திருடப்பட்ட 1,019 தொலைபேசிகள் கண்டுபிடிக்கப்பட்டு குற்றவாளிகளுக்கு எதிராகச் சட்டம் நிலைநாட்டப்பட்டுள்ளது.
இதேவேளை, தமக்குச் சொந்தமில்லாத ஒரு சொத்தை அல்லது கையடக்கத் தொலைபேசியைக் கண்டெடுக்கும் பட்சத்தில், அதனை உடனடியாக அருகிலுள்ள பொலிஸ் நிலையத்திலோ அல்லது பொலிஸ் உத்தியோகத்தரிடமோ ஒப்படைத்து அதற்கான சான்றிதழைப் பெற்றுக்கொள்ள முடியும்.
இலங்கையின் தண்டனைச் சட்டக்கோவையின்படி, தமக்குச் சொந்தமில்லாத ஒரு சொத்தை சட்டவிரோதமாகத் தம்வசம் வைத்திருப்பது குற்றவியல் குற்றமாகும் என்பதுடன், இதற்காக 2 ஆண்டுகள் வரை சிறைத்தண்டனை விதிக்கப்படலாம். அத்துடன், திருடப்பட்ட கையடக்கத் தொலைபேசி அல்லது ஏதேனும் ஒரு சொத்தை மலிவான விலைக்கு வாங்குவதும் சட்டப்படி குற்றமாகும் என்பதுடன், அத்தகைய குற்றத்திற்காக 3 ஆண்டுகள் வரை சிறைத்தண்டனை விதிக்கப்படலாம் எனவும் இலங்கை பொலிஸார் கடுமையான எச்சரிக்கை விடுத்துள்ளனர்.
